Qostanaıdaǵy órt: 2091 adam evakýatsııalanyp, 12 turǵyn jaraqat aldy

QOSTANAI. QazAqparat – Qostanaı oblysyna qarasty Áýlıekól aýdanyndaǵy órt bastalǵannan beri 2091 adam evakýatsııalanyp, 12 turǵyn túrli jaraqat aldy. Bul týraly Tótenshe jaǵdaılar mınıstrliginiń jedel shtabynan málim etti, dep habarlaıdy QazAqparat tilshisi.

Aıta keteıik, 6 qyrkúıek kúni tańerteń júrgizilgen barlaý jumystarynan soń, negizgi kúsh pen tehnıka Baǵanaly aýylyna baǵyttaldy . Oǵan Qorǵanys mınıstrligi men jergilikti atqarýshy organdardyń ınjenerlik tehnıkasy da jumyldyryldy.

«Eldi mekenderge qaýip tónip turǵan joq. Amanqaraǵaı, Lesnoe, Ozernoe jáne Baǵanaly aýyldarynda qaraýyldaý uıymdastyrylyp, jumystar júrgizilýde. Jalyndap janyp jatqan ýchaskeler joq. Qazirgi tańda qaldyq ot oshaqtaryn sóndirilip jatyr», - dep málimedi QR TJM jedel shtabynan.

Órt bastalǵan ýaqyttan bastap Amanqaraǵaı, Ozernoe jáne Lesnoe aýyldarynan - 1841, Baǵanaly jáne Qazanbasy eli mekenderinen 250 adam qaýipsiz jerlerge kóshirildi. Búginde evakýtsııalanǵandardyń basym kópshiligi óz baspanalaryna oraldy. Al qalǵandary týystarynyń úıine qonystandy.

Jedel shtab dereginshe, órt kezinde 12 adam túrli jaraqat alǵan. Onyń ishinde 7 turǵyn, orman sharýashylyǵynyń 1, ákimdiktiń 1 jáne TJM 3 qyzmetkeri bar. Munymen qosa, tilsiz jaý saldarynan 1935 jyly týǵan bir adam kóz jumdy.

Qosa ketsek, buǵan deıin Qostanaıdaǵy órtten zardap shekkenderge úıler salý jumystary bastalyp jatqanyn jazǵan edik.

Qostanaı oblysy ákiminiń orynbasary Ǵaýez Nurmuhambetovtyń aıtýynsha, baspanalar Maqtaaraldaǵy sý tasqyny kezinde júzege asyrylǵan joba negizinde salynady.