Qostanaıdaǵy qýyrshaqtar teatry tuńǵysh ret qazaq tilinde ertegi qoıdy
«Kýkareký» - atalǵan mekemede memlekettik tilde kórsetilip otyrǵan tuńǵysh qoıylym. Qýyrshaqtar teatrynda qazaq tilinde ertegi qoıý týraly alǵash bastama kótergen Qostanaı oblystyq mádenıet basqarmasynyń basshysy Erlan Qalmaqov bolatyn. Ideıa ujym dırektory Nıkolaı Mıherskııden de qoldaý tapty.
«Memlekettik tildegi shyǵarmalardy sahnalaý biz úshin tıimdi. Kórermenderimiz kóbeıedi. Degenmen óz kúshimizben shyǵara almasymyz belgili. Sebebi, til máselesi kedergi. Sondyqtan, І.Omarov atyndaǵy oblystyq qazaq drama teatrymen baılanys ornattyq. Teatrdyń kórkemdik jetekshisi Álııa Baımahan usynysymyzdy qýana qabyldap, kómegin aıap qalmady. Áıtse de, kóńilimizde qobaljýdyń bolǵany ras. Buǵan deıin 2013 jyly bir ret eki tilde qoıǵanymyz bolmasa, tájirıbemiz joq. Tusaýkeserdi balǵyndardyń jyly qabyldaǵanyna qarap, birlesken jobamyz sátti shyqty deýge negiz bar», - deıdi qýyrshaq teatrynyń dırektory.
Al oblystyq qazaq drama teatrynyń bas rejısseri Álııa Baımahannyń sózinshe, bul tájirıbe almasý eki tarap úshin de tıimdi.
«Qýyrshaq teatrynyń ózindik ereksheligi bar. Jansyz beınelerdi «tiriltý», kishkentaı kórermenderdi ılandyrý ońaı emes. Drama teatrynyń ártisteri osy jaýapty mindetti oıdaǵydaı alyp shyqqanyna qýanyshtymyn. Bul olar úshin shyńdalý sabaǵy boldy. Jekelegen kemshilikter júre túzeledi. Eń bastysy, arada tyǵyz shyǵarmashylyq baılanys ornady. Ony odan ári damytýǵa bárimiz múddeli bolýymyz kerek», - dep oıyn túıindedi Álııa Baımahan.
Oblystyq mádenıet basqarmasy basshysynyń orynbasary Roza Oljabaeva qýyrshaqtardyń qazaq tilinde ertegi qoıyp otyrǵanyna qýanyshty ekenin jetkizip, jobanyń bolashaqta jalǵasyn tabýyna tilektestik bildirdi. Balǵyn kórermenderdi qýanyshqa bólep, qoıylymǵa «til bitirgen» teatrdyń ártisteri - Nurlan Baıshın men Móldir Qubash.
Ertegi jelisi tóbet Sharık pen qoraz, jalqaý mysyq, aılaker túlki arasynda órbıdi. Keıipkerler dostyqty, adaldyqty dáriptep, jamanshylyqpen kúresýge úndeıdi. Salaýatty ómir saltyn ustanýǵa shaqyrady. Oqıǵa barysynda balalar belsendi aralasyp, qaıyrymdy keıipkerlerge jaqtasyp otyrdy. Bul erteginiń olardy sendire alǵanyn, kóńilinen shyqqanyn kórsetse kerek.
«Kýkareký» atty erteginiń avtory - G.Landaý. Ony qazaq tiline tárjimalaǵan - qýyrshaqtar teatrynyń qyzmetkeri Botagóz Baımaǵanbetova. Qoıýshy-rejısser - ıÝlııa Semenova.