Qostanaıdaǵy kommýnaldyq kompanııa boryshkerlermen ázil vıdeo arqyly kúresip jatyr
Vıdeoda Qostanaıdyń qarapaıym turǵyny qaryzynan qutylýdyń ornyna tapqan aqshasyn ońdy-soldy shasha beredi. Asa qajet bop turǵanda páterdegi sý óshedi.
Kommýnaldyq kásiporyn osylaısha boryshkerlerge qarsy ázilmen kúresýge bel býǵan.
«Qostanaı Sý» MKK abonentter bólimi basshysynyń orynbasary Nadejda Ermashova MKK-ǵa jalpy 88 914 abonent tirkelgenin, sonyń bir bóligi kásiporyn qyzmetiniń aqysyn der kezinde tólemeıtinin aıtty.
«Qazirgi kezde debıtorlyq qaryzdyń jalpy somasy 120,6 mıllıon teńgeni quraıdy. Sonyń 68,1 mıllıon teńgesi turǵyndardyń boryshy bolsa, 52,5 mln teńgesin zańdy tulǵalar tóleýi tıis», - deıdi N. Ermashova.
Qostanaıda tipti 10 jyldan beri sýdyń qaryzyn tólemeı otyrǵan turǵyndar da bar eken. Reıd barysynda kompanııa jáne quqyq qorǵaý organdary ókilderimen áńgimeden soń áıel qaryzdyń bir bóligin tólep, qalǵanynan da qutylýǵa ýáde berdi.