Qostanaıdaǵy egistikterge zalal kelse, shyǵyny óteledi – AShM

NUR-SULTAN. QazAqparat – Qostanaıdaǵy órtten birde-bir aýyl sharýashylyǵy jerleri zardap shekken joq. Bul týraly QR Aýyl sharýashylyǵy vıtse-mınıstri Ábilqaıyr Tamabek aıtty, dep habarlaıdy QazAqparat tilshisi.

«Qostanaı oblysynda jergilikti ákimdikterdiń málimetine sáıkes, birde-bir aýyl sharýashylyǵy jerleri zardap shekken joq. Anyqtalǵan aqparattyń barlyǵy Tótenshe jaǵdaılar mınıstrligi tarapynan tek qana orman qory jerleri degen aqparat berýde. Qazirgi tańda Qostanaı oblysynda tótenshe jaǵdaı engizildi. Egerde aýyl sharýashylyǵy egistikteri zardap shegetin bolsa, taýar óndirýshilerge zııan kelse, onda tótenshe jaǵdaı esebinen erteńgi kúni shyǵyndary baǵalanyp, tolyǵymen óteletin bolady , - dedi Ábilqaıyr Tamabek Ortalyq kommýnıkatsııalar qyzmetinde.

Aıta keteıik, búgin saǵat 8.00-degi derekterge súıensek, Qostanaı oblysynda órtenip jatqan ýchaskeler qalmaǵan, qaldyq ot oshaqtaryn sóndirý jumystary júrgizilýde. Tórt aýmaqta (Amanqaraǵaı, Lesnoe, Ozernoe jáne Baǵanaly aýyldary) qaraýyldaý sharalary uıymdastyrylǵan. Azdaǵan jańbyr jaýǵandyqtan, aýa ylǵaldyǵy kúsheıdi.

Óńirde jalpy zardap shekken 18 bıznes sýbektisi bar. Qalǵandarynyń janyp ketken múlkiniń quny áli eseptelip jatyr.