Qostanaıdaǵy demalys ornynda 5 jasar qyzdy aıý tistep aldy

QOSTANAI. QazAqparat – Qostanaı aýdanyndaǵy demalys ornynda kirekeı (urǵashy aıý-red) qyz balany tistedi. Bul faktini oblystyq polıtsııa departamentiniń baspasóz qyzmetinde túsindirdi, dep habarlaıdy QazAqparat tilshisi.

Aqparatty áleýmettik jelilerde oqıǵanyń kýágerleri men zardap shekken qyzdyń jaqyndary taratty.

«Olar 5 qyrkúıek kúni bes jasar qyzdyń ata-anasymen birge aýmaǵynda torǵa qoıylǵan kirekeı bar «Radýga» demalys ornyna kelgeni týraly aıtyp berdi. Anasy men qyzy ony tamaqtandyrmaq bolǵan. Basynda kirekeı ózin jaqsy ustaǵan. Odan keıin qyz bala óz betinshe torǵa jaqyndaıdy. Osy kezde kirekeı qyzdy aıaǵynan tartyp, ony birneshe ret tistegen. Balanyń aıǵaıyna onyń ata-anasy men demalyp jatqandar júgirip keldi. Qyz bala qutqaryldy. Jilinshigi tistelgen bala oblystyq balalar aýrýhanasyna jetkizildi», - delingen habarlamada.

Bolǵan oqıǵa rastaldy, atalmysh fakti boıynsha Qostanaı aýdanynyń polıtsııa bólimi QR QK-niń 114-baby «Densaýlyqqa abaısyzda zııan keltirýge» sáıkes sotaldy tergeýdi bastady. Ol 80 AEK kóleminde aıyppul nemese sol kólemde túzeý jumystaryn, nemese 20 táýlikke bas bostandyǵynan aıyrýdy qarastyrady. Bastapqy tergeý áreketteri júrgizildi.

Demalýshylar qazirgi kezde kirekeıdiń demalys ornynyń aýmaǵynda torda ekenin habarlap jatyr. Onyń janynda eskertý maqsatynda saqtyq sharalaryn saqtaý kerektigi týraly taqtaıshalar qoıylǵan.

Avtory Janna Musabaeva