Qostanaıdaǵy brýtsellez daýy: Aýrý maldy tapsyrmaǵandarǵa aıyppul salynady

<p>ASTANA. KAZINFORM &ndash; Buǵan deıin Qostanaı oblysy Áýlıekól aýdany Kalının aýylynda iri qaranyń brýtsellez aýrýyna shaldyqqanyn jazǵan edik. Dese de, keıbir turǵyn buǵan senbeı, qan synamasyn qaıta tapsyrýdy suraǵan. Quzyrly organdar máseleniń zań boıynsha retteletinin alǵa tartyp otyr.</p>

QR Aýyl sharýashylyǵy mınıstrliginiń málimetinshe, 2024 jyldyń 24 shildedegi saraptama aktisi boıynsha qosymsha dıagnostıkalyq zertteý nátıjesinde 49 bas maldan aýrýdyń oń nátıjeleri tirkelgen.

«Barlyq mal ıelerine veterınarlyq-sanıtarlyq talaptarǵa sáıkes aýyryp turǵan maldy sanıtarlyq soıýǵa tapsyrý jóninde nusqamalar berildi. Qazirgi ýaqytta 25 bas mal «Qostanaı Agro Prodýkt» soıý pýnktine jetkizildi. Alaıda 24 bas iri qara maldyń ıeleri tapsyrýdan bas tartty. Olarǵa nusqamany oryndaý úshin 2024 jyldyń 10 tamyzyna deıin ýaqyt berildi», - delingen Aýyl sharýashylyǵy mınıstrliginiń baspasóz qyzmeti taratqan aqparatta.

Zańnamaǵa sáıkes, mal ıeleri veterınarlyq talaptardy buzǵany úshin jaýapty bolady. Aýyrǵan maldy tapsyrýdan bas tartý QR zańdarynda qarastyrylǵan ákimshilik aıyppuldarǵa ákep soǵady. Nusqamany oryndamaý brýtsellezdiń taralýyna sebep bolyp, adamdar men maldardyń densaýlyǵyna aýyr qaýip tóndirýi múmkin.

Veterınarlyq qyzmet barlyq mal ıelerin veterınarlyq talaptardy qatań saqtaýǵa jáne aýrýmen kúres sharalaryn ýaqytynda qabyldaýǵa shaqyrady, bul brýtsellezdiń ári qaraı taralýyn boldyrmaýǵa jáne halyq pen maldardyń densaýlyǵyn qorǵaýǵa kómektesedi.

Esterińizge salsaq, redaktsııamyzǵa Qostanaı oblysy Áýlıekól aýdany Novojenın aýyldyq okrýgine qarasty Kalının aýylynyń turǵyndary habarlasyp, jan aıqaıyn jetkizdi. Olardyń aıtýynsha, sap-saý júrgen sıyrlary aıaq asty brýtsellez bolyp shyqqan.