Qostanaıda jyl basynan beri 35 myń kólik qurastyryldy

QOSTANAI. QazAqparat – Qostanaı oblysynda jyl basynan beri 7191 avtomobıl eksporttaldy. Bul týraly oblys ákimdiginde ótken apparat májilisinde Ekonomıka jáne bıýdjettik josparlaý basqarmasynyń basshysy Gúlbaram Musaǵazına málim etti, dep habarlaıdy QazAqparat tilshisi.

Ekonomıka jáne bıýdjettik josparlaý basqarmasy ótken 11 aıdyń qorytyndysyn jarııalady. Jalpy oblys boıynsha ár salada ósim baıqalady. Atap aıtqanda, ónerkásip óndirisiniń ósimi 7%, óńdeý salasy 19,2%, aýyl sharýashylyǵy 20,3%, qurylys jumystary 22,7%-ǵa ulǵaıdy.

«Jyl basynan beri oblystyń ónerkásip kásiporyndary 1,3 trln teńgeniń ónimin óndirdi, onyń ishinde óńdeý ónerkásibinde 782,9 mlrd teńgege qol jetkizdi. Tek mashına jasaý salasyndaǵy óndiris kólemi 1,5 ese artty. Avtomobıl jasaý óndirisin ulǵaıtý jalǵasýda. «SaryarqaAvtoProm» kompanııasy búginge deıin 35 myńnan astam avtokólik qurastyrdy. Jyl sońyna deıin taǵy 5 myńǵa jýyq tehnıka shyǵarý josparlanǵan. Shetelderge 7191 avtomobıl eksporttaldy. Avtobýs qurastyrý da jaqsy qarqyn aldy. 11 aı ishinde 1041 avtobýs naryqqa shyqty, bul ótken jyldyń sáıkes kezeńimen salystyrǵanda 2,4 ese artyq», - dedi Ekonomıka jáne bıýdjettik josparlaý basqarmasynyń basshysy Gúlbaram Musaǵazına.

Aýyl sharýashylyǵynda jalpy ónim kólemi 559 mlrd teńgeden asty. Jekeleı alǵanda Qamysty, Naýyrzym, Áýlıekól, Qarasý, Jitiqara aýdandary eń joǵary nátıjeler kórsetken. Uzynkól jáne Qarabalyq aýdandarynda aýyl sharýashylyǵy kórsetkishteriniń tómendeýi baıqaldy.

Jalpy oblys ekonomıkasyna 2020 jyly 287,1 mlrd teńge ınvestıtsııa tartylǵan.