Qostanaıda jol apatynan qaza tapqandardyń sany jeteý boldy

QOSTANAI. QazAqparat – Qostanaı oblysynyń polıtsııa departamenti «Qostanaı-Áýlıekól» tasjolyndaǵy jol apatynan taǵy bir adamnyń qaza tapqanyn málimdedi, dep habarlaıdy QazAqparat tilshisi.

Polıtsııa qyzmetkerleri «Leksýs» avtokóliginde 3 adam, «Padjeroda» 4 adam bolǵanyn anyqtady.

Barlyq jolaýshy oqıǵa ornynda mert boldy.

«Sondaı-aq «Leksýs» kóligi Qostanaıdan Nur-Sultanǵa, al «Padjero» júrgizýshisi oblys ortalyǵyna bara jatqany belgili boldy» dep tolyqtyrdy polıtsııa departamenti ókilderi.

Jol apatyna qatysty densaýlyq saqtaý basqarmasy da pikir bildirdi.

«Oqıǵa ornyna eki jedel járdem brıgadasy jiberildi. 7 adam («Leksýs» kóligindegi úsh er adam men «Padjerodaǵy er adam men úsh áıel) oqıǵa ornynda mert boldy. Qazirgi ýaqytta bes adamnyń kim ekeni anyqtaldy» dep habarlady mekemeniń baspasóz qyzmeti.

Eske sala ketsek, buǵan deıin Qostanaı oblysynda iri jol-kólik apatynan alty adamnyń qaza tapqanyn habarlaǵan bolatynbyz.