Qostanaıda joǵalyp ketken 18 jastaǵy jigitti eriktiler men polıtsııa izdestirýde

QOSTANAI. QazAqparat – 18 jastaǵy Danıel Tarasevıch 4 naýryzda úıinen shyǵyp ketip, qaıta oralmaǵan. Sodan beri ony eshkim kórmegen. Qostanaı oblysynyń polıtsııa departamenti atalǵan faktini rastap, túsinik berdi, dep habarlaıdy QazAqparat tilshisi.

«2021 jylǵy 9 naýryzda oblys ortalyǵynyń 47 jastaǵy turǵyny Qostanaı qalasynyń Polıtsııa basqarmasyna júginip, óziniń 05.04.2002 jyly týǵan uly Danıel Tarasevıch Stepanovty izdeýge kómek kórsetýin suraǵan. Ol 4 naýryzda belgisiz baǵytqa shyǵyp ketip, búgingi kúnge deıin oralmaǵan», - dep habarlady departament.

Belgili bolǵandaı, joǵalǵan jigit buǵan deıin úıinen osylaı habarsyz ketip qalmaǵan, ishimdik ishpeıdi. Ózimen birge uıaly telefonyn alyp ketken, biraq qazirgi ýaqytta ol óshirýli.

«Atalǵan fakti boıynsha polıtsııa qyzmetkerleri eriktilermen birge izdeý sharalaryn júrgizýde. Іz-túzsiz joǵalyp ketken jigitti izdeýge oblystyń Polıtsııa departamentinniń jeke quramy jumyldyrylǵan. Jedel-izdestirý sharalary barysynda yqtımal kýálar men kýágerler anyqtalady», - dedi polıtsııa.

Jigittiń erekshe belgileri: boıy 170-175 santımetr, dene bitimi ortasha, salmaǵy shamamen 70 kg, arnaıy belgileri joq.