Qostanaıda joǵalǵan qyz aýyldan 3 shaqyrym jerdegi jasandy sý qoımasyna batyp ketken

QOSTANAI. QazAqparat – Polıtsııa departamenti qyzdyń denesiniń jasandy sý qoımasynan tabylǵanyn rastady, dep habarlaıdy QazAqparat.

Balanyń denesi ózi turǵan Jambyl kentinen 3 shaqyrym jerden tabyldy. Ol dronnyń kómegimen anyqtalǵan.

Polıtsııanyń málimetinshe, balanyń denesin jasandy sý qoımasynan polıtsııanyń aǵa leıtenanty Samat Eşanov pen erikti Damır Bekturǵanov tapty.

Oblystyq polıtsııa departamentiniń bastyǵy Erlan Omarbekov jaǵdaıǵa qatysty túsinik berdi.

«10 tamyz kúni izdeý jumystarynyń barysynda Erlanqyzy Mádınanyń denesi jasandy arnadan tabyldy. Bul – úlken tragedııa. Oblys, respýblıka turǵyndary, polıtsııa qyzmetkerleriniń atynan marqumnyń otbasyna qaıǵyryp kóńil aıtamyz. Bárimiz balany aman-esen tabatynymyzǵa sońyna deıin senip, úmittenip júrdik. Alaıda, jaǵdaı basqasha boldy», - dedi ol.

E.Omarbekovtiń aıtýynsha, qazirgi kezde búkil tıisti saraptamalar belgilenip, qorytyndysy qosymsha habarlanatyn bolady.

Eske sala ketsek, buǵan deıin Qostanaı oblysynda 7 tamyzda úıinen shyǵyp ketken 5 jasar qyz izdestirilip jatqany habarlanǵan.

Іzdeý jumystaryna 500-den astam polıtseı, tikushaqtar, sondaı-aq Ulttyq ulan men shekaradaǵy áskerı qyzmetkerler jumyldyryldy.

Myńdaǵan adam qyzdy Jambyl aýylyna irgeles egistik alqaptardan izdedi.

Keshe bes jasar Mádına Erlanqyzyn izdeý sharalary aıasynda egistik alqaptyń ár jerine sý men tamaq baılanǵan sharlar qaldyrý jóninde sheshim qabyldandy.

Keshki ýaqytta egistik alqaptyń ústinen deltaplandar ushyryldy.

Búgin, 10 tamyz keshkisin qyzdyń denesi tabyldy.