Qostanaıda jazba aqyndardyń respýblıkalyq aıtysy ótti
Osydan úsh jyl buryn «Rýhanı jańǵyrý» baǵdarlamasy aıasynda oblystyq «Qostanaı tańy» gazeti men oblystyń ishki saıasat basqarmasy birlesip qolǵa alǵan dástúrli joba bıyl aqpan aıynyń aıaǵynda bastalyp, tamyz aıyna deıin jalǵasty. Jyr saıysyna Qostanaı, Almaty, Qaraǵandy, Atyraý oblystarynan jáne Nur-Sultan qalasynan uzyn sany 18 aqyn qatysyp, alty aı boıy synǵa tústi.
«Bul jolǵy aıtysqa qazaq halqynyń bas aqyny, uly oıshyl Abaı Qunanbaevtyń 175 jyldyǵy arqaý boldy. Jalpy, joba bastalǵaly jazba aıtysta baǵy men babyn synaýǵa 50 shaqty úmitker nıet bildirgen. Olardyń ishinde tájirıbeli orta jastaǵy aqyndarmen qosa, stýdent jastar, tipti talapty oqýshylar da báıgege qosyldy. Bul da shyn darynnyń jas talǵamaıtynyna aıqyn dálel bolsa kerek. Dástúrli jobanyń jańa maýsymynda aqyndarymyz naǵyz daryn ekenderin taǵy da dáleldep, jyrsúıer jurtqa tamasha tartý jasaı aldy. Joba barysynda boılaryna tabıǵat bergen erek qabiletterin ǵana emes, ulttyq tereń tanym, jan-jaqty bilimderin kórsetip, alyp Abaıdyń rýhanı murasyn zerdelep, órnektep óleńmen óre bildi. Odan bólek, álemdi jaýlaǵan zaýalǵa, qazirgi qoǵamdaǵy ózekti máselelerge qatysty ózindik pikirlerge, azamattyq ustanymdarǵa kýá bola aldyq. Aqyndarymyzdyń qalamdarynan týǵan joldarǵa eldik murat-múdde, Otanǵa degen súıispenshilik, yntymaq-birlik syndy qundylyqtar arqaý bolǵanyn da ańǵarý qıyn emes. Sondyqtan sóz óneri saıysyna meılinshe jaýapkershilikpen qarap, jan salyp úles qosqandary úshin, oqyrmandardy jyrmen sýsyndatyp, jazba aıtystyń kórigin qyzdyrǵan aqyndardyń barlyǵyna aıtar alǵysymyz sheksiz», - dedi oblystyq ishki saıasat basqarmasynyń basshysy Záýre Báımenova.
Aqyndar alty aı boıy ınternet arqyly alamanǵa tústi. Aralarynan úzdikteri iriktelip, shyn júırikteri alǵa sýyrylyp shyqty. Bir aıta keterligi, bıyl pandemııa jaǵdaıyna, karantındik shekteý sharalaryna baılanysty, jyldaǵydaı júldegerlerdi marapattaý rásimi ótken joq.
«Jeńimpazdar esimi gazet jáne resmı saıt arqyly jarııa etilip otyr.
Jalpy úmitkerlerdiń qaı-qaısysy da qal-qadirlerinshe Hákim Abaıdyń rýhanı baı murasynan syr shertip, jaýhar sózderin úlgi etip úgittedi, alyp aqynnyń arman-muraty men qazaqtyń búgingi bet-beınesin astastyrýǵa umtyldy. Qalamger aıtyskerler taqyrypqa dendep qana qoımaı, búgingi qoǵamnyń «aıaq alysy, júrek qaǵysyn» ańdap, eldiń muńy men muqtajyn túgendedi, ózekti máselelerdi tolǵady. Eldik, ulttyq, rýhanı qundylyqtardy qalamyna arqaý etip, jazba aıtystyń tabıǵatyn jan-jaqty asha bildi. Aıta keteıik, úsh jyl boıy ótken jyr saıystary bıyl jeke jınaq bolyp shyqty. «Jazba aıtys – jyr-jaýhar» atty etjeńdi kitapqa úzdik aıtystar engizilip, qalyń oqyrmanǵa jol tartyp otyr», - deıdi «Jazba aıtys» jobasynyń úılestirýshisi, belgili aqyn Jandos Júsipbek.
Aqyndardy juptap, olardyń aıtystaryn syn-saraptan qazylar alqasy ótkizip otyrdy. Jyr básekesine Qazaqstan Jazýshylar odaǵynyń Qostanaıdaǵy fılıaly tóraǵasy, ádebıet synshysy Januzaq Aıazbekov, «Egemen Qazaqstan» gazetiniń Qostanaı oblysyndaǵy menshikti tilshisi Nurqanat Qulabaev, «Qostanaı» telearnasy dırektorynyń orynbasary Abylaı Maýdanov tórelik jasady.
Qazylar alqasynyń sheshimimen arqalyqtyq aqyn Batyrlan Saǵyntaev jazba aıtystyń jeńimpazy atandy. 2-shi oryn elordalyq Ulanbek Baqytqa buıyrsa, 3-oryndy Nur-Sultan qalasynyń aqyny Nurdáýlet Ǵalymjanuly men Jangeldın aýdanynyń aqyny Zlıha Kenjeǵozına ózara bólisip aldy.