Qostanaıda jaıaý júrginshini kóligimen soqqan júrgizýshi qashyp ketken
15:00, 13 Qazan 2017
QOSTANAI. QazAqparat - Qostanaıda jol-kólik oqıǵasynan soń qashyp ketken kólik júrgizýshisi izdestirilýde, dep habarlaıdy oblystyq ІІD baspasóz qyzmeti.
Oqıǵa 9 qazan kúni saǵat 19:50 shamasynda bolǵan. «Lexus» avtokóliginiń júrgizýshisi Ál-Farabı men Chehov kósheleriniń qıylysyndaǵy jaıaý júrginshiler jolaǵynda 40 jastaǵy er adamdy qaǵyp ketken.
Jol-kólik oqıǵasynan soń jaıaý júrginshi qalalyq aýrýhanaǵa jetkizildi. Keıin belgili bolǵandaı, zardap shegýshiniń qabyrǵalary synyp, aıaǵynyń býyny shyǵyp ketken.
«Osy fakt boıynsha QR Ákimshilik quqyq buzýshylyq týraly kodekstiń 610-babymen ákimshilik óndiris isi qozǵaldy. Kúdiktige qatysty izdeý sharalary jalǵasyp jatyr» - delingen ІІD baspasóz qyzmeti habarlamasynda.