Qostanaıda jastardyń «áleýmettik toıy» ótti

QOSTANAI. QazAqparat – Búgin kóp jyldar boıy Qostanaı oblysy Polıtsııa departamentiniń qamqorlyǵynda bolǵan Nıkolaı Jıdelev degen jigit shańyraq kóterdi.

Onyń toıyn tártip saqshylary men oblystyq jastar resýrstyq ortalyǵynyń qyzmetkerleri uıymdastyrdy, dep habarlaıdy QazAqparat.

Qostanaıdaǵy balalar úıinde tárbıelengen Nıkolaı Jıdelevke qostanaılyq polıtseıler únemi kómek kórsetip kelgen. Endi onyń otaý qurý toıynan da syrt qalmady. Polıtsııa departamentińiń Kadr saıasaty basqarmasynyń bastyǵy, polıtsııa polkovnıgi Baǵdat Itesov toı ıelerin quttyqtaı keldi.

«Biz birtutas eldiń azamattarymyz, qıyn-qystaý sátte qol ushyn sozý – ár adamnyń paryzy. Nıkolaı óte izdenimpaz, eńbekqor jigit. Búgin Qostanaı oblysy Polıtsııa departamentiniń bastyǵy Beket Aımaǵambetovtiń jáne barlyq tártip saqshylarynyń atynan quttyqtap, syılyǵymyzdy tabys ettik», - dedi ol.

Sondaı-aq, polıtseıler keleshekte Nıkolaıdyń otbasyna qoldaý kórsetip, tipti, onyń jumysqa ornalasýyna septigin tıgizýge ýáde etti.

Oblystyq jastar resýrstyq ortalyǵynyń monıtorıng sektorynyń jetekshisi Leıla Bekseıitovanyń sózinshe, jastar ǵalamtor arqyly tabysqan.

«Nıkolaı óziniń ata-anasyn eshqashan kórmegen. Al Veranyń anasy jesir qalǵan. Negizi bul toıdy ótkizý mamyr aıynda josparlanǵan. Osy ýaqytqa deıin kásipkerlerdi izdestirdik», - deıdi Leıla Bekseıitova.

Jas otbasyǵa Qostanaı oblysynyń ákimi Arhımed Muhambetov baǵaly syılyq tapsyrdy.