Qostanaıda jastar saıasatyn iske asyrý úshin qosymsha qarajat bólinedi

QOSTANAI. QazAqparat - Oblys ákimdiginde Elbasynyń Qazaqstan halqyna Joldaýyn talqylaýǵa arnalǵan aktıv jınalysy ótti, dep habarlaıdy QazAqparat.

Aktıv májilisine oblys ákiminiń orynbasarlary men apparat basshysy, oblystyq basqarmalar men departamentter basshylary, oblystyq máslıhat hatshysy, joǵary oqý oryndarynyń rektorlary, onlaın rejımde qalalar men aýdandardyń ákimderi qatysty. Oblys ákimi Arhımed Muhambetov bıylǵy Joldaý árbir shańyraqtyń, ár azamattyń jaǵdaıyn jaqsartýǵa arnalǵanyn aıtty.

«Joldaýda áleýmettik salanyń barlyq baǵytyn qoldaý qarastyrylǵan. Otbasy, turǵyn úı, shaǵyn bıznes, eńbekaqy, jastar, aýyl sharýashylyǵy, quqyq qorǵaý júıesin jańǵyrtýdyń joldary kórsetildi. Sondyqtan bizge endi atalǵan ózgerister men jahandyq syn-qaterlerge laıyqty tótep berýdiń jolyn qalyptastyrý asa mańyzdy. Joldaýda belgilengen ózekti mindetterdi saralaı otyryp, árbir salada naqty josparlar qurýymyz kerek. Bul tapsyrmalardy iske asyrý - elimizdiń damýyndaǵy taǵy bir jańa tarıhı kezeń», - dedi Arhımed Muhambetov.

Jıynda ár sala boıynsha shaqyrylǵan sarapshylar baıandama oqydy. Qazaqstannyń Eńbek Eri Saıran Buqanov jerdi paıdalaný jáne qorǵaý máselesi jóninde ashyqtyq dep esepteıdi. Sondaı-aq, ol oblystyq aýyl sharýashylyǵy basqarmasyna tehnıkalardy sýbsıdııalaý boıynsha tıisti mınıstrlikke usynys jasaýy kerek deıdi.

«Jas Qanat 2006» qus fabrıkasynyń dırektory Qaırat Maıshev ózderiniń atqarǵan jumystarymen bólisti. Búginde bul kásiporyn ónimderin Reseı, Qyrǵyzstan, Aýǵanstan, Tájikstan memleketterine eksporttaıdy.

Munan soń oblystyq jolaýshylar kóligi jáne avtomobıl joldary basqarmasynyń basshysy Baqytbek Esenǵulov, Qostanaı pedagogıkalyq kolledjiniń dırektory Ǵalııa Orazymbetova, «Jas Otan» JQ oblystyq fılıalynyń tóraǵasy Álibek Muhamedjanovtar Joldaýdaǵy basymdyqtar týraly pikir bildirdi.

Óz kezeginde oblys ákimi Arhımed Muhambetov Joldaýǵa baılanysty orynbasarlaryna tapsyrmalar júktedi.

«Marat Júndibaevqa 5 qarashaǵa deıin aqparattyq-túsindirý tobyn quryp, aımaqtarǵa shyǵý josparyn jasaýdy tapsyramyn. Joldaýdy talqylaý boıynsha barlyq qala, aýdan ákimderi ıdeologııalyq aktıv ótkizsin. Strategııalyq qujatta kórsetilgen baǵytta sarapshylardy anyqtap, mektepterde dáris oqyǵandary jón. 2019 jyldy «Jastar jyly» dep belgiledi. Sondyqtan jastar saıasatyn iske asyrý boıynsha qosymsha qarajat qarastyrýdy Erlan Spanovqa júkteımin», - dedi óńir basshysy.

Oblys ákiminiń birinshi orynbasary Ǵaýez Nurmuhambetov bos jatqan jerlerdi tıimdi paıdalaný jáne qorǵaý máselesin qaraıdy. Al Meıirjan Myrzalıev óńir eksporty áleýetin arttyrýǵa kúsh salmaq. «7-20-25» memlekettik baǵdarlamasynyń oryndalýyn Sergeı Karplıýk qadaǵalaıdy.

Sonymen qatar oblys ákimi barlyq qala, aýdannyń basshylaryna jergilikti avtomobıl joldaryn jóndeýdi basa nazarǵa alýdy tapsyrdy.