Qostanaıda jalǵan bankrottyq jarııalaǵan kásipker 5 jylǵa sottaldy

QOSTANAI. QazAqparat - Qostanaı oblysy boıynsha Memlekettik kirister departamenti jeke kásipkerdiń ádeıi bankrottyq jasaǵany úshin 5 jylǵa bas bostandyǵynan aıyrylǵanyn málimdedi, dep habarlaıdy QazAqparat.

Qostanaı oblysy boıynsha Mamandandyrylǵan aýdanaralyq ekonomıkalyq sottyń sheshimi boıynsha 2021 jylǵy qańtarda D esimdi jeke kásipker 185 mıllıon teńgeden astam bereshegine baılanysty bankrot dep tanyldy.

«Júrgizilgen taldaý boıynsha, qasaqana bankrottyq belgilerin jáne boryshkerdiń tólem qabiletsizdigine (dármensizdigine) ákep soqqan áreketterdi anyqtaý tártibine sáıkes, Memlekettik kirister departamenti D esimdi jeke kásipkerge qatysty qasaqana bankrottyqtyń belgilerin anyqtap, qorytyndy jasady. Kásipker turǵyn úıi men 2 jer ýchaskesin, sondaı-aq 2 avtokólik quralyn jubaıyna syıǵa tartý sharttary negizinde ıeliginen shyǵaryp, salyq bereshegi esebine óz múlkine bılik etýge shekteýden jasyrýǵa tyrysyp, zańsyz áreketter jasady», - dep jazdy vedomstvodan.

Osy fakt boıynsha jeke kásipkerge qatysty qylmystyq is qozǵaldy.

Qostanaı qalasynyń №2 sotynyń úkimimen atalǵan jeke kásipker QK 238-babynyń 1-bóliginde kózdelgen qylmystyq quqyq buzýshylyqtar jasaǵany úshin 5 jyl merzimge bas bostandyǵynan aıyrý túrindegi, kommertsııalyq kásiporyndar jáne uıymdarda 3 jyl merzimge uıymdastyrýshylyq-basqarýshylyq laýazymdardy atqarý quqyǵynan aıyra otyryp, kináli dep tanyldy.