Qostanaıda zaýyt elektrondy bırjanyń qateliginen sýbsıdııa ala almaǵan

<p>QOSTANAI. KAZINFORM — Qostanaı oblysynyń prokýratýrasy ınvestorlardyń quqyǵyn qorǵaý jáne ınvestıtsııalyq jobalardy qoldaý jumysyn jalǵastyryp jatyr. </p>

Qabyldanǵan sharalarmen qoldanystaǵy tigin óndirisin jańǵyrtý jobasyn júzege asyryp jatqan «Bolshevıchka» JShS-ne kómek kórsetildi.

Investıtsııalyq salym kólemi — 1 mlrd teńgeden asady, 55 jumys orny ashylǵan. 

2023 jyly «Bolshevıchka» zaýyty kooperatıvten seriktestikke aınaldy jáne elektrondy derekter qorynda jańadan qurylǵan dep sanaldy.

Osyǵan baılanysty kásiporyn «elektrondy eńbek bırjasy» platformasynyń jetilmegendigine baılanysty jumys oryndaryn sýbsıdııalaý máselesine tap boldy.

Ol arqyly jumys oryndaryn sýbsıdııalaý resimdeledi. 

Zańnamaǵa sáıkes, sýbsıdııany naryqta bir jyldan astam jumys istegen uıymdar ǵana ala alady.

Máseleni sheshý maqsatynda oblys prokýratýrasy ádilet organdarymen, QR Eńbek jáne halyqty áleýmettik qorǵaý mınıstrligimen jáne eńbek resýrstaryn damytý ortalyǵymen birlesip, aqparattyq júıelerdegi derekterdi biriktirý jáne konfıgýratsııa jumysyn júrgizdi, ótinim berý algorıtmderi ázirlendi.

Nátıjesinde másele sheshilip,  joba ári qaraı júzege asyp jatyr. 

Bıyl jańartylǵan tsehty paıdalanýǵa berý josparlanǵan.