Qostanaıda «Úıge qyzmet kórsetý» jobasy iske qosyldy
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamentiniń basqarma basshysy Gúlnar Shaǵyrova aıtqandaı, bilim berý mekemeleri qujat qabyldaý kezinde zańsyzdyqtarǵa jol beredi.
«Bastaýysh, negizgi orta, jalpy orta bilim berýdiń baǵdarlamalary boıynsha, bilim berý uıymdaryna qujattar qabyldaýdyń memlekettik standarty bekitilgen.
Degenmen, keı mekemeler qujattardyń qabyldanǵany týraly habarlamany 3-7 aralyǵynda beredi. Al, standartqa sáıkes, bul 5 kúnnen aspaýy tıis. Negizi, oblysta 500 mektep bar, onda ótken jyly 18929 bala tirkelgen. Taǵy bir aıta keterligi, «Bilim týraly» Zańnyń 6 babyna sáıkes, kez kelgen kent, aýyl, aýyldyq okrýg ákimi jergilikti eldi mekende mektep bolmaǵan jaǵdaıda bilim alýshylardy jaqyn jerdegi mektepke deıin jáne keri qaraı tegin tasymaldaýdy uıymdastyrady. Ákimder mektepke deıingi jáne mektep jasyndaǵy balalardy esepke alady. Al ata-analar tegin tasymaldaý týraly ótinishti jylyna bir-aq ret jazýy tıis», - deıdi G.Shaǵyrova.
Departament jaqynda «Úıge qyzmet kórsetý» jobasyn iske qosty. Bul joba aıasynda kóp balaly analarǵa, sondaı-aq, múgedek balalardyń ata-analaryna qyzmet kórsetý spektri, sonyń ishinde járdemaqylar, tikeleı olardyń úılerinde kórsetiledi. Qazir bul joba Taran jáne Meńdiqara aýdandarynda jaqsy júzege asyp keledi. Gúlnar Shaǵyrova memlekettik qyzmet kórsetý protsesterin avtomattandyrý týraly da sóz etti.
«Ótken jyly iske qosylǵan «Damý med» aqparattyq júıesi avtomattandyrylǵan qyzmetterdiń tizimin keńeıtýge múmkindik beredi dep esepteımiz. Atap aıtqanda, «statsıonarlyq naýqastyń medıtsınalyq kartasynan kóshirme berý» memlekettik qyzmet kórsetý tártibin elektrondyq formatqa aýystyrý usynylady. Bul qyzmetti alý ýaqytyn 60 mınýttan 15 mınýtqa deıin qysqartýǵa, dárigerdiń ýaqytyn únemdeýge múmkindik beredi», - dedi basqarma basshysy.