Qostanaıda úshinshi táýlikke sozylǵan órtti sóndirýge 7 tikushaq tartyldy

QOSTANAI. QazAqparat - Úshinshi táýlik boıy Áýlıekól aýdanyndaǵy iri órtti sóndirý jumystary júrgizilýde. Qazirgi ýaqytta jalpy aýdany 43000 gektardan asqan tilsiz jaýdy aýyzdyqtaýǵa 2193 adam, 224 birlik tehnıka, 7 áýe kemesi, 5 órt sóndirý poıyzy jumyldyryldy, dep habarlaıdy QazAqparat.

Ekologııa mınıstrliginiń málimetinshe, Qostanaı oblysynyń 1841 turǵyny evakýatsııalandy, Amanqaraǵaı kentiniń soltústik bóliginen - 1000, Ozernoeden - 250, Kalınınnen - 228, Lesnoe kentinen 363 adam qutqaryldy. Qazirgi ýaqytta Baǵanaly kentiniń turǵyndaryn evakýtsııalaý júrip jatyr.

«Ekpindi jel men kúnniń ystyq raıy órt sóndirý jumystaryn qıyndatyp tur. «Qazgıdromet» RMK derekteri boıynsha búgin Qostanaı oblysy Áýlıekól aýdanynyń aýmaǵynda aýa temperatýrasy +31 gradýsqa deıin saqtalady, jeldiń jyldamdyǵy 7 m/s jetedi», - dep jazylǵan vedomstvo habarlamasynda.

Aıta ketý kerek, Qostanaı oblysynda bir mezette 3 aýmaqta tabıǵı órt sóndirilip jatyr - Qarabalyq, Uzynkól jáne Áýlıekól aýdandarynda.

Qostanaı oblysynda orman órtteri faktileri boıynsha ishki ister organdary Qylmystyq kodekstiń 341-baby (ormandardy joıý nemese búldirý) jáne 2-bólimniń 204-baby (bóten múlikti abaısyzda joıý nemese búldirý) boıynsha qylmystyq ister qozǵady.

Vıdeodan alynǵan kadr/t.me/bort_01