Qostanaıda «Urpaqtar jadynda» aktsııasy bastaldy
«Urpaqtar jadynda» atty respýblıkalyq aktsııasynyń maqsaty - kóshelerdi abattandyrý jáne ardagerlerge qolǵabys etý. Іs-sharalar tizbegin «Nur Otan» partııasynyń Qostanaı qalalyq fılıaly men medıtsına kolledjiniń stýdentteri bastap ketti. Olar Ekinshi dúnıejúzilik soǵysta erlikpen qaza tapqan Sultan Baımaǵambetov batyrdyń qurmetine berilgen shahardyń basty kósheleriniń birine abattandyrý sharalaryn júrgizdi.
«Bul aktsııa partııalyqtar úshin jyl saıyn ótetin, dástúrli bastamaǵa aınaldy. Eskertkishtermen qatar, belsendi jastar memorıaldy taqtalar, batyrlardyń esimderi berilgen kóshelerdi tazartyp, kórkeıtý sharalaryna atsalysyp kelemiz. Igi sharaǵa qala turǵyndarynyń belsendiligin arttyrý, jastardyń boıyna eljandylyq, otansúıgishtik qasıetterdi darytý úshin bastaldy»,- deıdi «Nur Otan» partııasy Qostanaı qalalyq fılıalynyń keńesshisi Aıtóre Tursyn.
20-dan astam kolledj stýdenti qoldaryna qural-saıman alyp shyǵyp, kóshelerdi tazalady. Bul batyrlardyń rýhyna taǵzym, qurmet kórsetý, deıdi olar.
«Týǵan jeri men elin jaýdan qorǵap, týǵan halqyna sýyqta pana, ystyqta saıa bolǵan, Uly dala eliniń dańqty batyrlarynyń ómirimen óskeleń jas urpaqty etene tanystyrý - búgingi kúnniń basty maqsaty. Máselen, Sultan Baımaǵambetovtiń esimi astyqty aımaq shejiresiniń tarıhynda aıryqsha orny bar. Batyrdyń rýhyna qurmet kórsetý, keıingi tolqyn ókilderiniń paryzy», - deıdi Qostanaı medıtsınalyq kolledjiniń stýdenti Serik Baısultanov.
Aıta ketý kerek, respýblıkalyq aktsııa aıasynda Qostanaı oblysynyń ár aýdany men qalalarynda, shalǵaı jatqan eldi -mekenderde de abattandyrý sharalary uıymdastyryldy. Bas aıaǵy 47 nysan qamtyldy. Bul naýqan aldaǵy ýaqytta da jalǵasyn tappaq.