Qostanaıda turmystyq dúkender men kólik servısi ortalyqtarynyń jumysyna ruqsat berildi

QOSTANAI.QazAqparat – Qostanaı oblysynda halyqqa qyzmet kórsetetin áleýmettik nysandardyń jumysyna ruqsat berildi. Bul týraly Qostanaı oblysynyń memlekettik sanıtarlyq bas dárigeri E. Daýletbaev qaýly shyǵardy, dep habarlaıdy QazAqparat tilshisi.

«Avtojýý, shınomontaj sheberhanalary, avtomobılderdi, turmystyq tehnıka, saǵattardy, telefondardy, kompıýterlerdi, aıaq kıimdi jóndeý, tigin atelesi, kir jýý, hımııalyq tazalaý, kiltterdi jasaý oryndary kedergisiz jumys isteıdi. Atalmysh nysandarda kúsheıtilgen sanıtarııalyq-dezınfektsııalyq rejım saqtalýy tıis. «Qazpochta» AQ jumysy saǵat 9:00-den 18:00-ge deıin belgilendi. HQKO-nyń jumysy aldyn ala jazylý boıynsha saǵat 9-00-den 18-00-ge deıin belgilendi. Áleýmettik qashyqtyqty, betperdelik rejımdi, termometrııany, kúsheıtilgen sanıtarııalyq-dezınfektsııalyq rejımdi saqtaýdy qamtamasyz etý mindet», delingen qaýlyda.

Qostanaı oblysynyń turǵyndary 2021 jylǵy 8 aqpannan bastap qoǵamdyq oryndarda, qoǵamdyq kólikte, halyqqa qyzmet kórsetýge jáne demalýǵa arnalǵan úı-jaılarda medıtsınalyq nemese mata maskalaryn mindetti túrde alyp júrý kerek.

Bas sanıtar dárigerdiń qaýlysyna sáıkes densaýlyq saqtaý uıymdarynda, jedel járdem mashınalarynda, karantın úshin jergilikti atqarýshy organdar aıqyndaǵan úı-jaılarda, naýqastarmen baılanysta bolǵan adamdarǵa júrgizgen kezde patsıentter men medıtsına qyzmetkerleriniń kelisiminsiz aýdıo, foto jáne beıne túsirilimder júrgizýge tyıym salyndy.

Oblystyq polıtsııa departamenti turǵyn úı sektory, bazarlar, saýda obektileri, saıabaqtar, skverler, aýlaishilik balalar oıyn alańdary men sport alańdarynda kezekshilik uıymdastyryp, reıd júrgizedi. Qaýly talaptaryn buzyp, sanıtarııalyq-epıdemıologııalyq sharalardy saqtamaǵandar jaýapqa tartylady.