Qostanaıda turǵyn úı kezegin retteıtin ortaq baza engizý usynyldy
Memlekettik qyzmet isteri jáne sybaılas jemqorlyqqa qarsy is-qımyl departamentiniń basqarma basshysy Gúlnár Shaǵyrovanyń aıtýynsha, jyl basynan beri 4 salada saraptama jumystary júrgizildi. Olar: aýyl sharýashylyǵy, jer qatynastary, veterınarııa, TKSh.
«Ótken jyly atalǵan salalarda 651 myń qyzmet kórsetildi. Onyń ishinde, 570753 qyzmet aýyl sharýashylyǵynda. Mundaı taldaýlar memlekettik qyzmetterdi alý protsesin jeńildetý, múddeler qaqtyǵysyn boldyrmaý úshin júrgizildi. Máselen, jer ýchaskesin berý rásimderin taldadyq. Jer alý úshin 6 qujat qajet ekeni belgili. Atap aıtqanda, kezekke turý, jerge ornalastyrý jobasyn ázirleý jáne bekitý, jer ýchaskesin satyp alý-satý, jalǵa alý shartyn jasaý, jer ýchaskesine memlekettik aktini daıyndaý. Mine, osydan keıin ǵana jer alýshy tirkeledi. Muny daıyndaýǵa 6 aı ýaqyt ketetinin eskersek, adamdar kóbine jumysty aıaqsyz qaldyrady. Sondyqtan osy qujattardy biriktirý usynylyp otyr», - dedi Gúlnár Shaǵyrova.
Qostanaı oblysynda baspana qurylysy joǵary qarqynda salynyp jatqanymen, oǵan kezekke turýshylardyń arasynda múddeler qaqtyǵysy oryn alyp jatatyn jaǵdaılar bar. Ótken jyly oblys boıynsha 2 myńnan astam adam turǵyn úıge kezekke turdy. Degenmen, onyń 493-i kezekten óz erikterimen bas tartqan. Basty sebep - kezek retiniń jyljymaýy. Qazirgi ýaqytta úı kezegi E-ákimdik aqparattyq júıesi esebinen avtomattandyrylǵan. Tıisinshe, árbir ákimshilik-aýmaqtyq birlikke jeke kezek júrgiziledi. Bul rette Ekinshi dúnıejúzilik soǵysynyń múgedekteri men qatysýshylaryna, jetim balalar, ata-anasynyń qamqorlyǵynsyz qalǵan balalar, halyqtyń áleýmettik jaǵynan osal toptaryna bólek kezek bar.
«Zatobol kentinde - 1434, Zarechnyı aýylynda - 358, Mıchýrın aýylynda - 155 adam turǵyn úı kezeginde tur. Biraq, aýdanǵa bir ǵana baza berilgendikten kezek retiniń alǵa jyljýy birneshe jylǵa sozylyp ketýi yqtımal. Osyǵan oraı, biz turǵyn úı kezegine baılanysty jańa baǵdarlamalyq ónim engizýdi usynamyz. Bul ár aýyldaǵy turǵyn úı kezegin bir bazaǵa biriktiredi jáne ákimshilik resýrstardy qysqartýǵa, múddeler qaqtyǵysyn, kez kelgen sybaılas jemqorlyq kórinisterin boldyrmaýǵa múmkindik beredi», - dedi ol.
Jańa baǵdarlamalyq bazany engizý úshin árbir aýdan-qalanyń bıýdjetinen shamamen 2,5 mln teńge jumsalady. Bazany jergilikti IT-kompanııanyń biri engizedi.
Taǵy bir másele - memlekettik qyzmet kórsetýdegi qujattardyń retsiz suratylýy.
Mysaly, traktor basqarýǵa ruqsat alýdan júrgizýshi kýáligin alý áldeqaıda tez.
«Búginde qoldanystaǵy júrgizýshi kýáligin aýystyrý úshin qaıta medıtsınalyq tekserýden ótý talap etilmeıdi, sondaı-aq teorııalyq emtıhan tapsyrý alynyp tastaldy. Al traktor basqarý quqyǵyna kýálik alý úshin bastapqy ótinim men 086-Ý melıtsınalyq anyqtamasy jáne emtıhan alý komıssııasynyń hattamasy (standart Aýyl sharýashylyǵy mınıstriniń buıryǵymen bekitilgen - avtor) suralady. Bul aýylsharýashylyq kadrlarynyń jumysyna edáýir kedergi», - dep esepteıdi basqarma basshysy.
Qaǵaz qujattardyń elektrondy formatqa kóshirilýi de kún tártibinen túsken emes. Sebebi, oblystaǵy 752 qyzmettiń tek 205-i «Elektrondy úkimet» arqyly júzege asady.
«Qyzmetterdi elektrondyq formatqa kóshirý boıynsha memlekettik organdardyń tómen belsendiligi zańnamalyq reglamentteýdiń jáne olardy avtomattandyrý boıynsha qyzmet berýshilerdiń mindetteriniń bolmaýyna baılanysty dep esepteımiz. Sondyqtan «Memlekettik kórsetiletin qyzmetter týraly» Zańnyń 10-babyna túzetýler engiziledi dep kútemiz», - dep túsindirdi Gúlnár Shaǵyrova.