Qostanaıda tuńǵysh halyqaralyq IT mektep ashyldy

QOSTANAI. QazAqparat – Tsıfrlyq damý mınıstrligi men Qostanaı oblysy ákimdiginiń qoldaýymen Qostanaı ınjenerlik-ekonomıkalyq ýnıversıtetiniń bazasynda jańa oqý orny ashyldy, dep habarlaıdy QazAqparat tilshisi.

IT-mektep – Lerna halyqaralyq IT jobasy negizinde jasalǵan offlaın jáne onlaın oqytatyn biregeı baǵdarlama.

«IT baǵyt – álemdegi eń qarqyndy damyp kele jatqan baǵyttardyń biri. Onymen qosa elde ІT salasynda kadrlardyń joǵary tapshylyǵy bar. Sondyqtan Prezıdent óz Joldaýynda 2025 jylǵa deıin 100 myń joǵary bilikti IT mamandy daıarlaýdy tapsyrdy. Óńirimizde bıylǵy jyly – 135, 2025 jylǵa qaraı 540 maman daıarlaý mindeti tur», - dedi Qostanaı oblysy ákimdiginiń aqparattandyrý, memlekettik qyzmetterdi kórsetý jáne arhıvter basqarmasynyń basshysy Azamat Qashıev.

Jańa oqý ornynda jastardy IT jáne Digital salasyndaǵy zamanaýı mamandyqtar boıynsha oqytý josparlanýda.

Birinshi kýrs – Python-da baǵdarlamalaý. Python – baǵdarlamalaýdaǵy eń tanymal tilderdiń biri. Baǵdarlama veb-ázirleýde, qoldanbalardy jasaýda, derekterdi taldaýda, avtomattandyrý júıelerinde qoldanylady. Stýdentter oqý sońynda halyqaralyq sertıfıkat (dıplom) alady. Oqý uzaqtyǵy – 18 apta. Mektep mamyr aıynyń basynda tolyqtaı qyzmetine kirisedi.