Qostanaıda tolassyz jaýynnan kópqabatty úıdegi páterler zaqymdaldy

QOSTANAI. QazAqparat – Áleýmettik jelide qatty nóserden zaqymdalǵan páterlerdiń vıdeosy tarady. Onda páterlerdiń kergish tóbesine sý tolyp, páterlerge shelekter men sharalar qoıylǵan, tóbeden sý sorǵalap aǵýda. Qostanaı ákimi Marat Júndibaev turǵyndarmen kezdesti, dep habarlaıdy QazAqparat tilshisi.

Qostanaı ákiminiń baspasóz qyzmeti habarlaǵandaı, qalada qatty nóserden Chernyshevskıı jáne Baıtursynov kóshesindegi eki turǵyn úıdegi birneshe páter zaqymdaldy. Onda merdiger uıym kúrdeli jóndeý júrgizip jatyr.

«Osyǵan baılanysty qala ákimi oqıǵa ornynda turǵyndarmen kezdesip, zardap shekken turǵyndardyń páterlerin kórip shyqty. Tekserý barysynda úılerdiń shatyryn shuǵyl jabý úshin dereý qosymsha jumys kúshin tartý týraly tapsyrma berildi. Sonymen qatar, TJM qyzmeti men kommýnaldyq uıymdarǵa jelilerdi tekserý tapsyryldy», - dedi baspasóz qyzmetinen.

Sonymen qatar, zalaldy anyqtaý úshin komıssııa ókilderine zardap shekken páterlerdi aralap shyǵýdy tapsyrdy. Al múlikti qalpyna keltirý jáne páterlerdi jóndeý boıynsha barlyq jumystar merdiger uıym esebinen uıymdastyrylady.

«Jumystar qala ákiminiń jeke baqylaýyna alyndy. Qala ákimi óziniń jáne qala ákimdiginiń atynan turǵyndardan keshirim suraıdy, sondaı-aq osy jaǵdaıǵa túsinistikpen qaraýdy suraıdy», - dedi baspasóz qyzmetinen.

Janna Musabaeva