Qostanaıda tegin sport sektsııalaryna jarty mıllıard teńge bólinedi

QOSTANAI. QazAqparat — Qostanaılyq balalar arasynda shahmat, boks jáne fýtbol eń tanymal tegin sport sektsııalaryna aınaldy. Bıyl Qostanaı oblysynda tegin sektsııalar uıymdastyrý úshin 500 mıllıon teńge bólindi, dep habarlaıdy QazAqparat tilshisi.

Oblysta tegin sektsııalar ótken jyldyń jazynda, sporttyq tapsyrysty júzege asyrý bastalǵan kezde paıda boldy. Oblystyq dene shynyqtyrý jáne sport basqarmasy basshysynyń orynbasary Elena Kıreevanyń aıtýynsha, qazirgi ýaqytta artsport.edu.kz portalynda 93 jetkizýshiden túsken 230 ótinim maquldanǵan. Olar sporttyń 71 túriniń 19 túri boıynsha sport sektsııalaryn uıymdastyrý boıynsha qyzmetter usynǵan.

«Sektsııalar eń tanymal sport túrleri boıynsha uıymdastyryldy. 1311 adamǵa shahmat, 963 adamǵa boks, 843 adamǵa fýtbol, 628 adam voleıbol jáne 581 adamǵa erkin kúres sport sektsııalary uıymdastyrylǵan. Aıta ketý kerek, jetkizýshiler jattyǵý jumystaryn uıymdastyrý turǵysynan shyǵyny eń az sport túrlerin – shahmat, boks, fýtbol, voleıboldy tańdaıdy. Osy ýaqytqa deıin birde-bir jetkizýshi qysqy sport túrleri boıynsha, sondaı-aq erekshe qajettilikteri bar balalarǵa arnalǵan sektsııalardy uıymdastyrý boıynsha mindettemeler alǵan joq»,- dep atap ótti E. Kıreeva.

Jetkizýshiler tarapynan barlyǵy 13 066 tegin sportpen shuǵyldanatyn oryn uıymdastyrylǵan.

Memlekettik sporttyq tapsyrysty iske asyrý boıynsha jumyspen oblystyń 17 óńiri qamtylǵan. Olardyń qatarynda Qostanaı, Rýdnyı, Lısakov, Arqalyq qalalary jáne Amangeldi, Naýyrzym jáne Qamysty aýdandarynan basqa 13 aýdan bar.

«Bıyl memlekettik sporttyq tapsyrysty iske asyrýǵa 500 mln teńge qarastyrylǵan, onyń 389,9 mln teńgesi sáýir aıyndaǵy tólemdi qosa alǵanda ıgerildi. Qazirgi ýaqytta jetkizýshiler aldynda bereshek joq»,- dep atap ótti Elena Kıreeva.