Qostanaıda tasqynnan zardap shekken ár adamǵa 100 myń teńgeden ótemaqy tólene bastady

<p>QOSTANAI. KAZINFORM - Óńirde oblys ákimi Qumar Aqsaqalovtyń tóraǵalyǵymen sý tasqyny saldaryn joıý jónindegi jedel shtab óz jumysyn jalǵastyryp jatyr.&nbsp;</p>

Qostanaı oblysynyń 3 aýdanynyń aýmaǵyndaǵy sý tasqynynan keltirilgen zalaldy baǵalaý jónindegi komıssııa óz jumysyn bastady, olar – Amangeldi, Jangeldi aýdandary jáne Arqalyq qalasy.

Óńir ákimi jedel kómek kórsetý, barlyq múmkin resýrstardy tartý boıynsha naqty tapsyrma berdi.

«Úıge jarty saǵatqa sý kirse de, bul otbasylar zardap shekti. Eshkim memlekettiń kómeginsiz qalmaýy tıis» — dep atap ótti Qumar Aqsaqalov.

29 naýryzdan bastap TJ rejımi jarııalanǵannan keıingi kúni Qostanaı oblysynda sý tasqynynan zardap shekkenderge alǵashqy tólem tólene bastady.

Otbasynyń árbir múshesine 100 myń teńgeden 183 adam tólem aldy. Shamamen bir otbasyna orta eseppen 500-600 myń teńge bólinedi.

Barlyǵy 18 mln teńgeden astam tólendi.

 

Bul tólemder turǵyn úıdi jalǵa alý, azyq-túlik, kıim-keshek satyp alý sııaqty negizgi qajettilikti qanaǵattandyrýǵa arnalǵan.

Birinshi kezektegi tólemderden basqa ataýly áleýmettik kómek, sondaı-aq jyljymaly, jyljymaıtyn múlik pen maldy qalpyna keltirýge qarajat qarastyrylǵan.

Qarjy basqarmasynyń basshysy Alma Júsipovanyń aıtýynsha, tıisti kómek alý úshin zalaldy baǵalaý jónindegi komıssııaǵa júgingen jón.

«Ótinish toltyrý, otbasy quramyn kórsetý jáne jeke kýálikti, sondaı-aq qarajatty esepteý úshin shot usyný qajet», — dep qorytyndylady Alma Aýtenqyzy.

Sondaı-aq bıznestiń áleýmettik jaýapkershiligi sheńberinde demeýshilik kómek tartylady. Eshkim beı jaı qarap qalmaıdy.