Qostanaıda taqııalar kórmesi ótti

ASTANA. QazAqparat - Qostanaı oblystyq Dostyq úıinde dástúrli qazaq  mádenıetiniń merekesi ótti. Onda taqııalar, ulttyq áshekeı buıymdar jáne baýyrsaqtar kórmesi uıymdastyryldy, dep habarlaıdy QazAqparat alau.kz-ke silteme jasap. 

Kórmede bir-birine uqsas taqııalar bolǵan joq, árqaısysy óz sánimen erekshelenip turdy. Ár taqııa sándi jiptermen, paıetkalarmen, iri monshaqtarmen jáne bıserlermen bezendirilgen.

Ár halyqtyń taqııaǵa degen óz talaby bar. Taqııany tek Azııada ǵana emes, Kavkazda da kıedi.

«Biz alǵash ret taqııalar kórmesin uıymdastyrdyq. Kórmede túrli ulttardyń, halyqtardyń 20-dan astam taqııa túri usynyldy. Mysaly, qazaqtyń taqııasy konýs tárizdi bolyp kelse, ózbekterdiki tórtburyshqa uqsaıdy», - deıdi qazaq dıasporasynyń ókili Aıjan Bekmanova.

Qostanaıda taqııalar kórmesinen bólek, baýyrsaqtar kórmesi de alǵash ret ótti.

«Munda túrli halyqtardyń 10 túrli baýyrsaǵy usynyldy. Olardyń ishinde tatar, grek, bashqurt, qazaq, qyrǵyz baýyrsaqtary bar. Olardyń dámi de erekshe. Bal qosylǵany da, kúnjit qosylǵany da joq emes», - dep túsindirdi Qostanaı oblystyq dostyq úıiniń baspasóz hatshysy Olga Goraı.
 

Shara kontserttik baǵdarlamaǵa ulasty.