Qostanaıda «Smart city» jobasynyń 5 baǵyty júzege asyrylady

QOSTANAI. QazAqparat - Qostanaıda «Aqyldy kólik» qosymshasy jasalynyp jatyr. Bul týraly ekonomıka salasyn tsıfrlandyrýǵa baılanysty ótken jıynda málim boldy, dep habarlaıdy QazAqparat tilshisi.

Qalalyq TKSh, jolaýshylar kóligi jáne avtomobıl joldary bóliminiń basshysy Alekseı Tarasovtyń aıtýynsha, Qostanaı qalasynda «Smart city» jobasynyń 5 baǵyty júzege asyrylady. Solardyń biri - «Aqyldy kólik».

«Bul keshendi júıe jolaýshylardy qoǵamdyq kólik qozǵalysynyń kestesi, avtobýstardyń júretin joly  týraly jedel aqparatpen qamtamasyz etedi. Sonymen qatar, tótenshe jaǵdaılar oryn alǵan bolsa, lezde habar beredi. Qala turǵyndary atalǵan jobanyń qosymshasyn óz telefondaryna júkteı alady», - deıdi Tarasov.

Qostanaı oblysy ákiminiń orynbasary Meıirjan Myrzalıev aldymen áleýmetti jelilerdi paıdalanyp, halyqty qulaqtandyrýǵa shaqyrdy.

«Bul jobalardyń barlyǵy sheneýnikterge emes, turǵyndar úshin jasalyp jatyr. Sondyqtan áleýmettik jeliler arqyly halyqty aqparattandyryńyzdar. Saýalnama alyp, keri baılanys júrgizińizder. Kemshin tustaryn anyqtaý kerek», - dedi Meıirjan Myrzalıev.

Jıynǵa qatysqan «Astana Innovations» kompanııasynyń sarapshysy Aleksandr Chýprın de tsıfrlandyrýǵa baılanysty pikirin aıtty.

«Rasyn aıtý kerek, sizder engizgeli jatqan qosymshany astanalyqtar birazdan beri paıdalanyp keledi. Buǵan qosa, Elordada kóshe qozǵalysyn retteıtin «Sergek» atty baǵdarlama bar. Sondaı-aq, «Smart city» jobasynyń taǵy bir tarmaǵy «aqyldy kóshe shamdaryn» da iske qosýdy usynamyn. Osy arqyly kóshelerdi jaryqtandyrýǵa jumsalatyn elektr qýatyn 60 paıyzǵa deıin únemdeýge múmkindik alasyzdar. Bastysy shamdardy kútip ustaýǵa ketetin shyǵyndar azaıady», - deıdi maman.