Qostanaıda sıyr tuqymynyń palatasy quryldy

QOSTANAI. QazAqparat - Qostanaı oblysynda iri qaranyń sımmental tuqymynyń respýblıkalyq palatasy qurylatyn boldy. Mundaı sheshim «Atameken» kásipkerler palatasynda ótken jıynda málim etildi, dep habarlaıdy QazAqparat.

Qara maldyń sımmental túrin ósirýmen aınalysatyn kásipkerlerden quralǵan yntaly top ókilderi birqatar máselelerdi sheshý úshin birtutas organ qajet ekenin aıtady. Olardyń sózinshe, «Asyl tuqymdy mal sharýashylyǵy týraly» QR zańyna sáıkes árbir asyltuqymdy qara malǵa arnalǵan respýblıkalyq palata jumys isteýi kerek, onyń oblystar men qalalarda óz bólimshesi bolýy zańdy.

Oblystyq kásipkerler palatasynda ótken keńeste «Agrogenetıks» JShS jetekshisi Mark Gýmerov óz pikirimen bólisti.

«Qazaqstanda 57 myńnan astam sımmental tuqymdy sıyr bar. Onyń kóp bóligi Qostanaı oblysyna tıesili. Sondyqtan, palatany bizdiń oblysta qurý jóninde sheshim qabyldap otyrmyz»,- deıdi M.Gýmerov.

Mark Gýmerovtyń sózinshe, sımmental tuqymyna sýbsıdııa tólenbeıdi. Buryn ár basqa 20 000 teńgeden berilse, qazir tek asyl tuqymdy buqalardyń uryǵyn satyp alýǵa ǵana sýbsıdııa tólenedi. Onyń ózinde tabyndy basqarý jónindegi baǵdarlama bolsa ǵana 12 mln teńge beriledi.

«Bul - shaǵyn sharýashylyqtar úshin óte qomaqty aqsha. Alaıda, sýbsıdııa tek syrttan ákelinetin qara malǵa ǵana tólenedi. Al biz otandyq tólderge de tólengenin qalaımyz», - dedi kásipker.

«Frýnzenskoe» JShS, «Bataly» JShS jáne «Jeleznodorojnoe» JShS ókilderi Gýmerovtyń bul usynysyn qoldap otyr. Olar qara maldyń sımmental tuqymynyń palatasyn qurýǵa biraýyzdan daýys berdi.

«Keńeske qatysýshylardyń bárin sıyr tuqymynyń tazalyǵy oılandyrady. Biz óz tarapymyzdan sizderdi árdaıym qoldaýǵa ázirmiz» , - deıdi oblystyq kásipkerler palatasynyń dırektory Murat Ábenov. Qara maldyń sımmental tuqymy palatasynyń quramyna tek qana kásipkerler emes, ǵalymdar, mal dárigerleri endi. Al palata keńesiniń tóraǵasy bolyp «Bataly» JShS dırektory Jansart Ahmetov, dırektory bolyp Mark Gýmerov taǵaıyndaldy. Jaqyn arada palata ádilet organdarynda tirkelmek. Sodan keıin palata basshylyǵy elimizdegi sımmental tuqymyn ósirýmen aınalysatyn basqa da sharýashylyqtardyń jumysymen tanysýdy josparlap otyr.

Eske salsaq, byltyr BQO-da et eksporty áleýetin arttyrý baǵytynda iri qara malyn asyldandyrý úshin ǵylymı-selektsııalyq jumystar talqylanǵan bolatyn.