Qostanaıda sheteldik ınvestorlarǵa arnalǵan front-keńse ashylady
Oblystyq kásipkerlik jáne ındýstrıaldy-ınnovatsııalyq damý basqarmasy basshysynyń mindetin atqarýshy Oljas Saparbekovtiń sózinshe, bıyl aımaqtyń áleýmettik-ekonomıkalyq damýy úshin tabysty jyl boldy. Barlyq salada ilgerýshilik baıqalady. 2019 jyldyń 10 aıynda ónerkásip sektoryndaǵy kórsetkish 3,9 paıyzǵa ósken. Taý-ken óndirisindegi kásiporyndar qarqyndy jumys istep tur. Sondaı-aq, tartylǵan ınvestıtsııalar men eksporttalǵan ónimder kórsetkishi de kóńilge qonymdy. Taǵy bir aıta keterligi, kásipkerlik jáne ındýstrıaldy-ınnovatsııalyq damý basqarmasy «Tobyl» ÁKK AQ-men birlesip «bir tereze» qaǵıdatymen ınvestorlardy súıemeldeý úshin óńirlik front-keńse qurady. Front-keńse Qostanaı qalasynyń ındýstrııalyq aımaǵynyń ákimshilik-turmystyq kesheniniń ǵımaratynda jumys isteıdi. Front-keńse bazasynda ınvestıtsııa tartýǵa qatysatyn memlekettik mekemeler men oblystyq qurylym ókilderin ornalastyrý josparlanýda.
«Jyl basynan beri aımaǵymyzǵa 226,4 mlrd teńge ınvestıtsııa tartylǵan. 2016 jyly negizgi kapıtalǵa kelgen ınvestıtsııa kólemi 178,5 mlrd teńge, 2017 jyly 202 mlrd-tan astam teńge, 2018 jyly 249 mlrd teńge boldy. Jalpy ındýstrııalandyrý baǵdarlamasy sheńberinde oblysta 2010 jyldan beri 91 aýqymdy joba júzege asty. 6 myńnan artyq jumys orny ashyldy. Ásirese, óńdeýshi ónerkásiptiń nátıjeleri jaqsy. Negizgi kapıtalǵa tartylǵan ınvestıtsııalyq qarjynyń arqasynda Qostanaı qalasynda Indýstrııalyq aımaq boı kóterdi. Onda qazir 400 mlrd teńgeniń 15 jobasy iske asýda. «Belarýs» jáne «Kırovets» traktorlary qurastyryla bastady. Aýyl sharýashylyǵy salasynda sheteldik áriptestermen birlesip qolǵa alǵan «Bio Grain» zaýytynyń qurylysy júrip jatyr. Ol aýyl sharýashylyǵy ónimderin tereńdete óńdeıtin bolady», - dep málim etti basqarma basshysynyń mindetin atqarýshy.
Investıtsııa tartý – salyq túsimin arttyrý jáne halyq turmysyn túzeýge baǵyttalǵan qadamdardyń biri. Aldaǵy 5 jylda Qostanaıda 2,3 trln teńgeni quraıtyn 40-tan astam joba júzege aspaq.
Arhımed Muhambetov álsiz ınvestıtsııa oblystyń negizgi kórsetkishterine teris áser etetinin aıtty. Sol sebepti aýdan-qala ákimderi óńirge ınvestorlardy tartý boıynsha keshendi sharalar atqarady.
«Sheteldik kásipkerler Qostanaı oblysynyń ekonomıkalyq ahýalyn joǵary baǵalaıdy. Áriptestik baılanysty nyǵaıtýǵa qashanda múddeli. Investıtsııalyq jobalardyń iske asyrylýy aıryqsha baqylaýymyzda. 2019 jyly kólik qurastyrý salasy úshin mańyzdy jobalar iske asyryldy. Avtokólik shyǵaratyn Qytaıdyń alpaýyt kompanııalary «Saryarqa avtoóndiris» seriktestigimen tıimdi áriptestik baılanys ornatty. Osy qarqynnan túspeýimiz qajet. Sheteldik ınvestorlardy tartý jumysy jalǵasa beredi», - dep túıindedi oblys basshysy.