Qostanaıda rýhanı jańǵyrý máselesi talqylandy
Rýhanı jańǵyrý máselesi aıasynda óńirde ústimizdegi jyldyń sáýir aıynan bastap 940 myń adamdy qamtyǵan 6298 is-shara ótkizilipti. Baǵdarlamany halyq arasynda nasıhattaý jumystaryn odan ári kúsheıtý maqsatynda Qazaqstan halqy assambleıasynyń janynan qurylǵan aqparattyq top barlyq aýdanda túsindirý jumystaryn júrgizgen.
«Memleket basshysynyń «Bolashaqqa baǵdar: rýhanı jańǵyrý» baǵdarlamasyn syrtqy úgit-nasıhat quraldary arqyly túsindirý jumystaryn júrgizý maqsatynda 140 bılbord, 176 banner jáne 17 kerme, 1371 poster ornatyldy. Oǵan qosa «Rýhanı jańǵyrý - Qostanaı» atty mobıldik qosymsha jumys isteıdi. Al aqparattyq-túsindirý jumystary az júrgizilgen Naýyrzym, Jitiqara, Qamysty, Uzynkól aýdandarynyń ákimdikterine habarlama jiberildi», - dedi oblys ákiminiń orynbasary Marat Júndibaev óz baıandamasynda.
Qostanaı oblysy ákimi Arhımed Muhambetov aqparattyq-túsindirý jumystaryna mán bermeı otyrǵan aýdan ákimderin synǵa aldy.
«Uzynkól aýdanynda nebári 41 is-shara ótkizilipti. Baǵdarlamalyq maqala sáýir aıynda jarııalansa da, vızýaldyq aqparattyq jabdyqtar áli ilinbegen. Bul másele Qamysty men Fedorov aýdandaryna da qatysty. Kórsetkishter tómen. Túsindirý jumystary sapaly júrgizilsin! Olqylyqtyń ornyn toltyryńyzdar» - dedi Arhımed Begejanuly.
«Atameken» baǵdarlamasy negizinde óńirde quny 3 mlrd 340 mln teńge bolatyn 349 joba qolǵa alyndy. Oǵan Qostanaı aýdanyndaǵy Ozernoe selosyndaǵy mádenıet úıiniń kúrdeli jóndelýi, Jitiqara aýdanyndaǵy stadıon qurylysy, Áýlıekóldegi eki shaǵyn ortalyqtyń ashylýy sııaqty birqatar mańyzdy jobalar kiredi. Ákimdik 164,7 mln teńgeni quraıtyn 80 memorandýmǵa qol qoıdy.
Oblys ákimi otyrysty qorytyndylaı kele, maqalada aıtylǵan mindettemelerdiń júzege asýyna kúsh-jiger jumyldyrý, vızýaldyq aqparattyq jabdyqtardy kóbeıtý kerektigin basa aıtty.