Qostanaıda psıhdıspanserden eki naýqas qashyp ketti
13:03, 17 Shilde 2022
QOSTANAI. QazAqparat – Qostanaı oblysynda polıtseıler júıke júıesi aýrýlarynyń aýrýhanasynan qashqan eki naýqasty izdep tapty. Bul týraly QazAqparat tilshisi habarlaıdy.
Eki naýqas buǵan deıin de atalǵan mekemeden óz betimen ketip qalyp otyrǵan.
«Qostanaı oblystyq psıhıatrııalyq ortalyǵynan eki naýqastyń qashyp ketkeni týraly aqparat keshe tańerteń tústi. Іzdeý sharalary nátıjesinde naýqastar Qostanaı oblysy Jambyl kentinen búgin 09:00-de tabyldy. Olar osy ýaqytqa deıin ózen jaǵalaýynda bolǵan», - dedi polıtsııadan.
Vedomstvodan atap ótkendeı, qashyp ketken naýqastar aýyr qylmys jasaǵany týraly messendjerlerde tarap jatqan aqparat – jalǵan.