Qostanaıda polıtsııa qyzmetkeri qyzmettik kólikpen esirtki tasymaldaǵan

<p>ASTANA. KAZINFORM &ndash; Qylmystyq is Qostanaı oblysynyń sotynda qaraldy. Er adamǵa esirtki zattaryn taratqan jáne saqtaǵan degen aıyp taǵyldy. Ol qyzmet babyn paıdalanyp, qylmys jasaǵan.</p>

Qostanaı polıtsııasynyń esirtki qylmysyna qarsy kúres basqarmasy bastyǵynyń orynbasary psıhotroptyq zattardy satqany úshin sottaldy. Tekserý barysynda onyń avtokóliginen asa iri kólemde satý úshin zańsyz saqtalyp, tasymaldanǵan gashısh pen metkatınon tabylyp, tárkilendi.

Ol sonymen qatar, qysym kórsetý arqyly jazyqsyz adamdardy osy qylmysqa tartqan. Sottalýshy óz kinásin moıyndamaı, qorǵaýshylarymen birge qylmystyń joqtyǵyn alǵa tartyp, aqtaýdy talap etti. Alaıda onyń kinási jábirlenýshilerdiń, kýálardyń aıǵaqtarymen, tergeý áreketteriniń hattamalary men beınematerıaldarymen, saraptamalyq qorytyndylarmen jáne basqa da is materıaldarymen tolyq dáleldendi.

Sot oǵan ómir boıyna memlekettik qyzmette qyzmet atqarýǵa tyıym sala otyryp, 15 jylǵa bas bostandyǵynan aıyrdy, sondaı-aq «polıtsııa kapıtany» arnaıy ataǵynan aıyrdy. Úkim áli zańdy kúshine engen joq.