Qostanaıda polıtsııa qyzmetkeri adam óltirgeni úshin ustaldy

QOSTANAI. QazAqparat – Qostanaıda eki er adam arasyndaǵy janjal kisi ólimimen aıaqtaldy. Kúdikti – polıtsııa qyzmetkeri, dep habarlaıdy QazAqparat Qostanaı oblysy polıtsııa departamentiniń baspasóz qyzmetine silteme jasap.

Qylmys túnde saǵat úshter shamasynda Qostanaıdaǵy Táýelsizdik kóshesinde bolǵan.

«Qostanaı oblysynyń polıtsııa departamenti 99-baptyń 1-bóligimen («Kisi óltirý») 37 jastaǵy eki er adamnyń arasyndaǵy qaqtyǵys faktisi boıynsha sotqa deıingi tergeýdi bastady. Onyń bireýi tirkelgen myltyqtan oq atqan.

Alynǵan jaraqattan er adam qaza tapty. Kúdikti ustalyp, qamaýǵa alyndy. Tergeý amaldary júrip jatyr», - dep túsindirdi vedomstvo.

Polıtsııa departamentiniń baspasóz qyzmeti kúdiktiniń polıtsııa qyzmetkeri ekenin rastady.

«Qazirgi ýaqytta sotqa deıingi tergeý júrip jatyr, sondaı-aq PD ózindik qaýipsizdik basqarmasynda qyzmettik tergeý bastaldy», - dep tolyqtyrdy baspasóz qyzmeti.