Qostanaıda polıtseılerdiń jumysyn tekseretin mobıldi top quryldy
Polıtsııanyń baspasóz qyzmetiniń habarlaýynsha, arnaıy top kún saıyn tártip saqshylardyń jumysyn tekserýe shyǵady. Komendanttyq polıtseı bekitilip, patrýldik polıtsııa beketteriniń qyzmetin jáne kólik tártibin tekseredi. Qostanaı oblysy polıtsııa departamenti bastyǵynń orynbasary, polıtsııa polkovnıgi Ardaq Yntyqbaev agenttik tilshisine mobıldik toptyń jumysy týraly berdi.
«Polıtsııa qyzmetkeri zańdardy saqtaýda ǵana emes, sondaı-aq, syrtqy kelbetin retke keltirip, minez-qulqyn jaqsy jaǵynan kórsete bilýi kerek. Belgilengen talaptar boıynsha tártip saqshylary maskalyq rejımdi saqtaýǵa, ózimen birge qyzmettik kýáligi men jetonyn alyp júrýge mindetti. Patrýlde ózimen birge qyzmetke shyqqan kezde jaramdylyǵy tekserilgen beınetirkegishi bolýy tıis. Mobıldi top polıtseılerdiń zańnamalyq turǵydaǵy bilimin, fızıkalyq daıyndyǵyn jáne jaýyngerlik mashyqtaryn tekseredi. Barlyq aýmaqtyq polıtsııa organdary turaqty tekserýlerden ótedi», — dedi A.Yntyqbaev
Ardaq Yntyqbaev jumys barysyndaǵy polıtsııa qyzmetkeriniń maqsat-mindetine toqtaldy. Aıtýynsha, tártip saqshysy quqyq buzýshylyqtyń aldyn alýdan bastap, sybaılas jemqorlyqqa jol bermeýge, kez kelgen qaýipti iste adal, beıtarap, batyl áreket etýdi ustanady.
«Polıtsııa azamattardyń jeke ómirine qol suǵylmaýyna, konstıtýtsııalyq quqyqtarynyń saqtalýyna jaýap beredi. Balalarmen, áıeldermen, múmkindigi shekteýli adamdarmen jáne qarııalarmen qarym-qatynasta sypaıylyq pen ádeptilik tanytady. Olardyń ótinishteri men aryzdaryna shynaıy jáne obektıvti qaraýǵa, qajetti kómek, onyń ishinde alǵashqy medıtsınalyq járdem kórsetýge daıyn turady. Sondaı-aq, tártip saqshysy daýly jaǵdaılardy sheshe bilýi kerek», - dep túsindirdi polıtsııa polkovnıgi.