Qostanaıda ótken ǵasyrdyń tarıhı sáýlet eskertkishi «Aqmeshit» qaıta jańardy
Bul jaıynda oblys ákimi Arhımed Muhambetov óziniń resmı Instagram paraqshasynda jazdy.
«Búgin «Aqmeshit» kıeli nysanyna jáne onyń aýmaǵynda ornalasqan ákimshilik ǵımaratqa bardym. Ótken jyldyń mamyr aıynda «Aqmeshit» sáýlet eskertkishinde ǵylymı-jańǵyrtý jumystary aıaqtalǵan bolatyn. 2020 jyly ákimshilik ǵımaratqa da jańǵyrtý jumysy júrgizildi. 1954 jyly salynǵan bul ǵımarat ábden tozyǵy jetip, eskirgen bolatyn. Qaıta jańǵyrtý kezinde ǵımarattyń irgetasy bekitilip, qasbeti jáne shatyry, ınjenerlik jeliler jóndeldi, esik-terezeleri jańartyldy» deıdi Arhımed Muhambetov.
Onyń aıtýynsha, ákimshilik ǵımarat Qostanaı oblysy ákimdiginiń din isteri basqarmasynyń balansyna ótedi.
Endi bul ǵımaratta basqarma ujymy men oǵan baǵynysty mekeme — din máselelerin zertteý ortalyǵy ornalasady.
«Atalǵan mekemelerdiń qyzmetin uıymdastyrý dinı qatynastar salasyndaǵy memlekettik saıasatty tıimdi iske asyrýǵa yqpal etedi» deıdi aımaq basshysy.
Eske sala keteıik, biz buǵan deıin Qostanaıdaǵy «Aqmeshit» obektisinde ǵylymı rekonstrýktsııa júrgizilip jatqanyn jazǵan bolatynbyz.