Qostanaıda órtten zardap shekkenderge jınalǵan qarajat qalaı jumsalady

QOSTANAI. QazAqparat – Qostanaı oblysynyń Áýlıekól aýdanynda tótenshe jaǵdaı kezinde orman órtinen zardap shekkenderge qarajat jınaý úshin «Qaıyrymdylyq KZ» biryńǵaı qory qurylǵan bolatyn. Osy ýaqytqa deıin oǵan qazaqstandyqtardan 491 mıllıon teńgeden astam qarajat kelip túsken, dep habarlaıdy QazAqparat tilshisi.

Qor quryltaıshylarynyń biri Gúlmıra Qapenovanyń aıtýynsha, qor órtten zardap shekkenderge kómek kórsetý, qarajatty ashyq jınaý jáne BAQ-ta turaqty esep berý maqsatynda qurylǵan.

«Bul qostanaılyqtarǵa kómek beretin jalǵyz qor deı almaımyz. Biraq bul – Áýlıekól jáne Qarasý aýdandaryndaǵy órt saldarynan týyndaǵan máselelerdi sheshý úshin negizgi qarajatty jınaıtyn oblystyń biryńǵaı qory. Búgingi tańda jeke jınaqtar kóp, sondyqtan búkil aqshanyń durys jınalyp, jumsalýynyń ashyqtyǵyn kórsetý úshin biryńǵaı qor qurý bastamasy kóterildi. Bul jumys áleýmettik jeliler men BAQ arqyly kórsetilip otyrady», - dep atap ótti G.Qapenova

Sonymen qatar, qorǵa birneshe kún boıy qarajat kelip túsip jatyr.

Ardagerler keńesiniń tóraǵasy, sondaı-aq qor quryltaıshylarynyń biri Batyrbek Ahmetovtiń aıtýynsha, 7 qyrkúıek tańerteńgi jaǵdaı boıynsha qorǵa 491 mln 614 myń teńge túsken.

Qazaqstandyqtar qorǵa aqsha jınaýdy áli de jalǵastyryp jatyr.

«Qordaǵy aqshany qaıda jiberetinimizdi aıqyndaıtyn úsh baǵyt bolady. Birinshi baǵyt – adamdar. Bul – birinshi kezekte orman órtinen zardap shekkenderge kómek kórsetý. Olardyń máselesi sheshilgennen keıin ǵana aýdannyń ınfraqurylymyn qalpyna keltirýge kómek kórsetiledi. Úshinshi baǵyt (eger qarajat qalatyn bolsa) – orman qoryn qalpyna keltirý, kógaldandyrý», - dep sózin túıindedi G.Qapenova.