Qostanaıda órtten zardap shekken flora men faýnany qalpyna keltirýge qansha ýaqyt kerek – Jibek Joly

NUR-SULTAN. QazAqparat – «Jibek Joly» telearnasyndaǵy «Novoe vremıa» baǵdarlamasyna aýyl sharýashylyǵy ǵylymdarynyń doktory Danııa Sársekova qonaq retinde qatysqan bolatyn. Ǵalym Qostanaı oblysynda órtke oranǵan flora men faýnany qalpyna keltirýge qansha ýaqyt kerek ekenin aıtty, dep habarlaıdy QazAqparat tilshisi.

«Ormandy alqaptyń 20%-dan astamy órtendi. Alqap negizinen qylqan japyraqty bolǵandyqtan aýasy taza meken sanalatyn. Janýarlar da kóptep qyryldy. Orman jabaıy ańsyz qaldy deýge bolady. Órt sáti beınelengen sýretterden juptuıaqty janýarlardyń óligin kórýge bolady» - deıdi ǵalym

Onyń paıymynsha, órtke oranǵan alqaptyń qaıtadan jasyl jelekke bólenýi úshin keminde jarty ǵasyr ketedi.

«Buǵan kem degende 50-60 jyl qajet. Ókinishke oraı, qazir orman sharýashylyqtarynyń bári burynǵydaı Orman sharýashylyǵy jáne janýarlar álemi komıtetine baǵynbaıdy. Buryn Aýyl sharýashylyǵy mınıstrligi eldegi búkil orman alqaptaryna jaýap beretin. 2002 jyldan bastap orman sharýashylyǵynyń bir bóligi jergilikti ákimdikterdiń ıeligine ótti. Tek erekshe qorǵalatyn aýmaqtar ǵana Orman sharýashylyǵy komıtetine qaraıdy. Órtengen orman alqaby orman sharýashylyǵynyń kúshimen qalpyna keltiriledi. Órt nege birden sóndirilmedi? Meniń oıymsha, orman sharýashylyqtarynyń materıaldyq-tehnıkalyq jabdyqtalýy nashar, baılanys ta álsiz. Adam sany jetpegendep esepteımin», - dedi Danııa Sársekova.