Qostanaıda Naýryzǵa oraı az qamtylǵan 317 otbasyna azyq-túlik úlestirilgen

QOSTANAI. QazAqparat - Qostanaı oblysynda Naýryz meıramy qarsańynda 317 az qamtylǵan otbasyna azyq-túlik jıyntyǵy tapsyrylǵan, dep habarlaıdy QazAqparat.

«Amanat» partııasy bastamashylyq etken «Baqytty otbasy» partııalyq jobasyn iske asyrý sheńberinde Naýryz meıramyn merekeleý qurmetine Qostanaı oblysynda kópbalaly jáne múgedek balalardy tárbıelep otyrǵan, qazirgi tańda AÁK alatyn 317 az qamtylǵan otbasy azyq-túlik jıyntyǵyn aldy.

Bul jaıynda aımaq basshysy Arhımed Muhambetov málim etti.

«Men ózim birneshe otbasyna baryp, azyq-túlik jıyntyǵyn usyndym. Aldymen Anna Pınejskaıanyń otbasyna bardym, ol kópbalaly jáne múgedek balany tárbıelep otyr. Annanyń 5 balasy bar, jalǵyz ósirip jatyr. Sondaı-aq, 4 bala tárbıelep otyrǵan kópbalaly Deripsáli Qalamqastyń otbasyna jáne «Altyn alqa» alqasymen marapattalǵan Shákirova Janat otbasyna azyq-túlik sebetterin tabys ettim. Sonymen qatar, bizdiń oblystyń basqa da otbasylaryna mundaı sebtter berildi. Azyq-túlik jıyntyǵyna un, qant, kúnbaǵys maıy, shaı, jarma, makaron ónimderi jáne kámpıt sııaqty qajetti ónimder kiredi» dep jazdy ákim.

Sonymen qatar, atalǵan joba aıasynda oblys kásipkerleri men aýyl sharýashylyǵy taýarlaryn óndirýshiler, partııa músheleri muqtaj otbasylarǵa jóndeý jumystaryn júrgizý, azyq-túlikpen, qajetti kómir jáne otyn qorymen qamtamasyz etý, qaryzdardy óteý jáne kommýnaldyq qyzmet kórsetýdi qalpyna keltirý, ýly gaz datchıkterin ornatý boıynsha kómek kórsetý bastamasyn qoldady.

Baǵdarlama iske asyryla bastaǵannan beri oblystyń 21 myńǵa jýyq otbasyna kómek kórsetilgen.

Bul baǵyttaǵy jumys jalǵasady.