Qostanaıda memorgan jándik ýlaıtyn 8 lıtr qospany 2 mlrd teńgege satyp almaq bolǵan

ASTANA. QazAqparat – Qostanaı oblysynda zııandy jándikterdi ýlaýǵa arnalǵan 8 lıtr hımııalyq qospany 2 mlrd teńgeden astam qarjyǵa satyp almaq bolǵan memlekettik organnyń áreketine shek qoıyldy. Bul týraly QazAqparat tilshisi óńirdiń sybaılas jemqorlyqqa qarsy is-qımyl departamentiniń baspasóz qyzmetine silteme jasap habarlaıdy.

Qańtar aıynda Qostanaı oblysy boıynsha sybaılas jemqorlyqqa qarsy is-qımyl departamenti taldaý jumysyn júrgizgen.

Onyń nátıjesinde Aýyl sharýashylyǵy mınıstrliginiń janyndaǵy komıtettiń birinen ınsektıtsıd satyp alý baǵasyn negizsiz kóterý belgilerin anyqtady.

«Atap aıtqanda, memlekettik organ 2 mlrd 127 mln teńgeden astam somaǵa 8 lıtr ınsektıtsıd (zııandy jándikterdi ýlaýǵa arnalǵan hımııalyq qospa – avtor.) satyp alýdy josparlaǵan. Bul rette, lottyń tehnıkalyq negizdemesinde ınsektıtsıdter túrli aýmaqtardy óńdeý úshin qajet ekeni jazylǵan», - dep málim etti quzyrly organnyń baspasóz qyzmetinen.

Qosa ketsek, buǵan deıin jalpy salmaǵy 160 tonna pııazdy Qostanaı oblysynan Reseıge alyp ótpek bolǵandar anyqtalǵanyn jazyp edik.