Qostanaıda memlekettik qyzmetke onlaın ornalasýǵa bolady

QOSTANAI. QazAqparat – Búgin oblystyq memlekettik qyzmet isteri departamentiniń jıynynda birneshe jańa joba tanystyryldy, dep habarlaıdy QazAqparat.

Qostanaı oblysynda memlekettik jumysqa ornalasý onlaın júıe arqyly da iske asady. Bul «Onlaın áńgimelesý» jobasy tanystyrylymynda belgili boldy.

«Atalmysh jobanyń sheńberinde oblys ortalyǵynan shalǵaıdaǵy aýyldardaǵy memlekettik qyzmetshiler onlaın júıe arqyly jumysqa qabyldana alady. Tipti, basqa oblystardyń qyzmetshileri de qyzyǵýshylyq tanytyp otyr. Bul ýaqyt pen shyǵyndy azaıtýǵa múmkindik beredi», - dep atap ótti oblystyq memlekettik qyzmet departamenti basshysynyń orynbasary Erlan Salyqbaev.

Aıta ketý kerek, joǵarǵy oqý ornyn endi aıaqtaǵan túlekter memlekettik qyzmetke onlaın jumysqa tura almaıdy. Olar aldymen ishki konkýrstan ótýi tıis.

Jıynda «Kásibı apparat – bilikti maman» qanatqaqty jobasy tanystyryldy. Bul memlekettik qyzmette eńbek tájirıbesinen ótýshilerge kómek retinde iske qosylyp otyr. Qazirdiń ózinde 87 adam oblystyń memorgandarynan tájirıbeden ótken.