Qostanaıda memlekettik qyzmet kórsetý ortalyǵy ashyldy
Jyl ótken saıyn turǵyndar tarapynan memlekettik qyzmet kórsetý sapasyna qatysty shaǵymdar kóbeıip keledi. Sol sebepti QR Memlekettik qyzmet isteri jáne sybaılas jemqorlyqqa qarsy is qımyl agenttigi memlekettik qyzmet kórsetý ortalyǵyn ashty.
«Halyqtyń sapaly qyzmet alýyna múmkindik jasaý memleketimizdiń basty ustanymyna aınaldy. «Rýhanı jańǵyrý» baǵdarlamasynyń «Ózgeristerdi ózińnen basta» kishi baǵdarlamasyn júzege asyrý maqsatynda Qazaqstannyń barlyq aımaqtarynda osyndaı ortalyqtar ashylýda. Qandaı da bir daýly máselelerdi, qujat rásimdeýdi, ortalyqtyń aty aıtyp turǵandaı, qyzmet salasyndaǵy barlyq suraqtardy zańdy turǵyda sheshýge baǵyttalǵan. Ortalyq «bir tereze» qaǵıdaty boıynsha jumys istep, memlekettik qyzmet kórsetý salasy men halyqtyń baılanysyn nyǵaıtyp, eki arada kópir qyzmetin atqaratyn bolady. Sondaı-aq ortalyq turǵyndarǵa tsıfrly qoltańba berý jáne elektrondy qyzmetter týraly tolyq aqparat beredi», - dedi QR Memlekettik qyzmet isteri jáne sybaılas jemqorlyqqa qarsy is qımyl agenttigi Qoǵammen baılanys departamentiniń dırektory Arman Berdalın.
Atap ketetin jaıt, bul ortalyqtyń qyzmetkerleri jalpy qyzmet kórsetýmen ǵana shektelmeıdi. Azamattardyń quqyqtaryn qorǵaý jóninde ázirlenetin qujattardy daıyndaýǵa kómektesedi jáne turǵyndardan túsken basqa da máseleler men oı-pikirlerdi jınaqtaıdy. Bul ortalyqtaǵy úsh orynnyń ekeýine departament qyzmetkerleri, bir qyzmet «Connection Point», ıaǵnı, halyqtyń elektrondy qyzmet alýyna, sonyń ishinde bos memlekettik qyzmet oryndaryna ótý úshin attestatsııa tapsyrýyna baǵyttalǵan.
Sondaı-aq, búgin Qoǵammen baılanys departamentiniń mamandary Zarechnyı aýylynyń jurtshylyǵymen, Zatobol kentindegi N.Naýshabaev atyndaǵy orta mekteptiń oqýshylarymen kezdesti. Turǵyndar memlekettik qyzmet isine qatysty saýaldaryn qoıyp, agenttik mamandarynan keńes aldy. Óz kezeginde meımandarǵa óńirdegi «Nurly jer» baǵdarlamasynyń oryndalý barysy tanystyryldy.