Qostanaıda memlekettik qyzmet alleıasy ashyldy

QOSTANAI. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamenti qyzmetkerleri «Memlekettik qyzmet alleıasyn» ornatty, dep habarlaıdy QazAqparat.

Bul bastama «90 myń jańa aǵash» aktsııasy aıasynda qolǵa alynyp otyr. Departament qyzmetkerleri oblystyq kitaphana turǵan aýmaqqa birneshe túp tal ekti.

«Bul aýmaq «Memlekettik qyzmet alleıasy» dep atalady. Bizdiń qyzmetkerler ár apta saıyn alleıany abattandyrý jáne tazartý jumystaryn júrgiziedi. Turǵyndardyń ýaqyt ótkizýi úshin oryndyqtar qoıamyz. Bastama basqa óńirlerde de jalǵasýy tıis», - dedi departament basshysynyń orynbasary Erlan Salyqbaev.

Aıta keteıik, memqyzmet alleıasy qala ortalyǵyndaǵy Tolstoı jáne Altynsarın kósheleriniń qıylysynda ornalasty.