Qostanaıda qyzmettik ıtterdiń kómegimen 474 qylmys ashyldy

QOSTANAI. QazAqparat – Qostanaı oblysy polıtsııa departamentiniń kınologııalyq qyzmet ortalyǵy ótken 10 aıdyń jumysyn qorytyndylady, dep habarlaıdy QazAqparat Qostanaı oblysy polıtsııa departamentiniń baspasóz qyzmetine silteme jasap.

Búgingi tańda Qostanaı oblysy polıtsııa departamentiniń kınologııalyq qyzmet ortalyǵynda 28 qyzmettik ıt bar. Olarmen 12 kınolog jumys isteıdi.

Al jalpy oblysta qyzmettik ıtterdiń sany 70-ten asady.

Itter adamnyń izin bilýge, jarylǵysh zattardy, sondaı-aq esirtki zattaryn izdeýge úıretilgen. Sonymen qatar, olar odorologııalyq jumystar, ıaǵnı ıisterdi zertteýge jumyldyrylǵan.

Qyzmettik ıtterdiń jumysy joǵalǵan adamdardy tabýǵa ǵana emes, sonymen qatar qylmystardy izin sýytpaı ashýǵa kómektesedi.

Mysaly, 2020 jyldyń 10 aıynda qyzmettik ıtterdiń kómegimen 474 qylmys ashyldy.

«Jalpy Qostanaı oblysy PD kınologııalyq qyzmetiniń mamandary qyzmettik ıttermen 5489 zertteýdi júzege asyrdy, onyń ishinde 210-y – esirtki qylmysyna, 79-y jarylǵysh zattardy izdeýge qatysty. Krımınaldyq polıtseıler qyzmettik ıttiń kómegimen 54 esirtki qylmysyna qarsy derekti anyqtady» delingen polıtsııanyń baspasóz habarlamasynda.