Qostanaıda qutqarýshylar denesi jartylaı jansyzdanyp, qozǵala almaı qalǵan qurylysshyǵa kómektesti

QOSTANAI. QazAqparat – Qostanaıda qutqarýshylar shatyrdy buzyp jatqanda denesi jartylaı jansyzdanyp, qozǵala almaı qalǵan qurylysshyǵa kómektesti, dep habarlaıdy QazAqparat Qostanaı oblystyq TJD-niń baspasóz qyzmetine silteme jasap.

Qutqarýshylarǵa jedel járdem qyzmetkerleri telefon shaldy. Olar qaladaǵy turǵyn úıdiń shatyryn buzý jumysyn júrgizip jatqan qurylysshynyń arqa nervine zaqym kelip, saldarynan ol ornynan qozǵala almaı qalǵanyn habarlaǵan.

«Qutqarýshylar dereý oqıǵa ornyna attandy. Olar úıdiń eski shatyryna shyǵyp, zardap shekken er adamǵa alǵashqy kómek kórsetti. Alpınıst jabdyqtar, kóshpeli satynyń kómegimen er adamdy turǵyn úıdiń tóbesinen tómenge túsirip, jedel medıtsınalyq járdem dárigerlerine tapsyrdy», - dep habarlady TJD-dan.

Qazirgi kezde zardap shekken er adam dárigerlerdiń qaraýynda jatyr, onyń ómirine eshqandaı qaýip tónip turǵan joq.

Avtory Janna Musabaeva