Qostanaıda kóshe boıyna jaıylǵan órtten keıin 11 otbasy baspanasyz qaldy

QOSTANAI. QazAqparat - Qostanaıda turǵyn úı sektoryndaǵy órtten birneshe úıelmen zardap shekti, dep habarlaıdy QazAqparat.

Oblystyq tótenshe jaǵdaılar departamentiniń málimetinshe, 9 mamyr keshki 17.23 shamasynda Qostanaı qalasy Naberejnaıa kóshesindegi turǵyn úı sektorynda órt tutanǵan.

Áýeli qala shetinde Tobyl ózeniniń boıynda qamys janyp, bir sátte otqa oranǵan.

Qatty jeldiń saldarynan órt jaqyn mańdaǵy úılerge tarap, kóshe boıyndaǵy jeke sektordyń aýladaǵy qurylystaryn sharpydy.

Órt 1000 sharshy metr aýmaqty qamtyp, órttiń saldarynan 11-den astam turǵyn úı men 6 sharýashylyq qurylys jáne 4 avtokólik (onyń ishinde 2 júk kóligi), sonymen qatar 2 turǵyn úı ishinara zardap shekken. Janǵan qamystyń aýmaǵy 1,5 gektardan asty.

Órtti sóndirýge kúshti jel men qoıý tútin, sondaı-aq bir-birine jaqyn ornalasqan turǵyn úıler men aýla qurylystary kedergi boldy. Qaza bolǵandar men zardap shekkender joq,

Naberejnaıa kóshesi boıynsha 25 adam (onyń ishinde 5 bala) evakýatsııalandy.

Qostanaı qalasynyń ákimdigi turǵyndardy qonystandyrý úshin «Dostyq» profılaktorııinde ýaqytsha pýnkt daıyndady.

Órt 20:15-te aýyzdyqtalyp, 21:24-te tolyǵymen sóndirildi. Órtti sóndirýge TJD kúsh-quraldary jumyldyryldy (14 tehnıka jáne jeke quramnan 85 adam).

Órttiń shyǵý sebebi jáne zalaly anyqtalyp jatyr.