Qostanaıda qoldan jasalǵan alkogol ishimdikter saýdasy toqtatyldy

ASTANA. QazAqparat – Qarjylyq monıtorıng agenttiginiń Qostanaı oblysy boıynsha Ekonomıkalyq tergep-tekserý departamenti belgili brend ataýlarymen qoldan jasaǵan alkogol ónimderin satý boıynsha zańsyz is-árekettiń jolyn kesti. Bul týraly QazAqparat vedomstvonyń baspasóz qyzmetine silteme jasap habarlaıdy.

«Hennessy» - 430 bótelke, «Jack Daniels» - 12 bótelke, «Chivas Regal 18» - 20 bótelke esepke alý-baqylaý markasyz ishimdik ónimderi tárkilendi. Osy fakti boıynsha QR QK 222-babynyń 1-bóligi boıynsha sotqa deıingi tergeý júrgizilip jatyr. Tergeý múddesinde basqa aqparat jarııa etilmeıdi», - delingen habarlamada.

Jyl basynan beri oblystyq ekonomıkalyq tergep-tekserý departamentiniń qyzmetkerleri osymen úshinshi ret alkogol ónimderin ótkizý boıynsha zańsyz qyzmetti toqtatyp otyr.

Esterińizge sala ketsek, buǵan deıin Qostanaıda jalǵan esepke alý-baqylaý markalary bar alkogol ónimderin saqtaýmen jáne ótkizýmen aınalysqan JShS-niń biriniń quryltaıshysy áshkerelengen bolatyn. Júrgizilgen tintý barysynda jalǵan aktsızdik markalary bar 23 myńnan astam bótelke mólsherinde 40 túrli alkogol ónimi tárkilengen.

Sondaı-aq, 7 mln teńgeden astam somaǵa esepke alý-baqylaý markalary joq alkogol ónimderin shyǵarǵan jerasty tsehy anyqtaldy. Ol jerden 6 040 bótelke, 200 lıtr spırt mólsherinde daıyn alkogol ónimi, sondaı-aq mólsherlegish, spırtomer, qaqpaqtar tárkilendi.

Sondaı-aq, jyl basynda Departament jalǵan belgileri bar 93 myńnan astam bótelke alkogol ónimin qysymmen joıǵan bolatyn.