Qostanaıda kisi óltirgeni úshin sottalǵan soǵys ardageri túrmeden bosatyldy

NUR-SULTAN. QazAqparat - QR Joǵarǵy sotynyń qylmystyq ister boıynsha sot kollegııasy soǵys ardageri, 94 jastaǵy Ivan Sýrkovtyń isin qarady. Bul týraly QazAqparat tilshisi Joǵarǵy sottyń baspasóz qyzmetine silteme jasaı otyryp habarlaıdy.

Buǵan deıin habarlanǵandaı, I.Sýrkov óziniń baldyzy, 80 jastaǵy Nıkolaı Davydovqa gantelmen jáne pyshaqpen soqqy jasaǵan. Osy qylmysy úshin 4 jylǵa bas bostandyǵynan aıyrylǵan.

Kassatsııa kelesi negizder boıynsha sot úkiminiń kúshin joıdy:

N. Davydovtyń Sýrkovqa ózi kelip, bir bótelke araq ákelgeni, osydan keıin baryp janjal shyqqany eskerildi. Al bul kezde Sýrkov saý bolǵan. Osylaısha, Sýrkov Davydovqa soqqy jasap, munyń arty ólimge ákep soqqan.

Sýrkovtyń jasy 94-te ekeni, densaýlyq jaǵdaıy (Ekinshi toptaǵy múgedek, psıhıkalyq aýytqýshylyǵy bar. Osydan baryp qylmys jasaǵan), Ekinshi dúnıejúzilik soǵysqa qatysqany, jaýyngerlik nagradalarynyń - 1 dárejedegi Otan soǵysynyń ordeni men 2 dárejedegi Dańq ordeni, medaliniń bolýy, ony bas bostandyǵynan aıyrmaý týraly ujymdyq hattyń kelip túsýi, jumys boıynsha burynǵy áriptesteriniń jaǵymdy minezdemesi nazarǵa alyndy.

Sheshim shyǵarý kezinde osy jaǵdaılar eskerildi. Osylaısha, oǵan qylmysy boıynsha barynsha jeńil jaza taǵaıyndaý - quzyrly memlekettik organnyń baqylaýymen bas bostandyǵyn shekteý jazasyn berý ádiletti ári jetkilikti degen sheshim shyǵaryldy. Іs boıynsha jazany aýyrlatatyn jaǵdaılardyń joqtyǵy anyqtaldy.

Joǵarǵy sot osyǵan baılanysty I.Sýrkovty tutqynnan bosatyp, 5 jylǵa bas bostandyǵyn shekteý jazasyn taǵaıyndady.