Qostanaıda Qazaqstan men Reseı jastarynyń forýmy ótedi
Qostanaı oblysynda memlekettik jastar saıasaty tujyrymdamasyna sáıkes sharalar kesheni iske asyrylýda. Osy baǵytta da belgili jetistikter bar. Búginde oblysta jastar arasyndaǵy jumyssyzdyq deńgeıi 3,1 paıyzǵa deıin kemidi. Bul respýblıkalyq kórsetkishten 0,8%-ǵa tómen.
«Jastar jylynyń Jol kartasy aıasynda óńirimizde 78 is-shara qarastyrylǵan, olardy iske asyrýǵa barlyq memlekettik qurylymdar jumyldyrylmaq. Prezıdent tapsyrmasyna oraı jaqyn arada «Jas maman» baǵdarlamasy qabyldanatyn bolady. Ózderińizge málim, byltyr oblys aýmaǵynda «Zhas Project» jastar korpýsyn damytý jobasy iske asyryldy. 143 joba granttyq negizde qarjylandyryldy. Olardy 492 jas adam (onyń ishinde 18 múgedek adam) júzege asyrdy. Bólingen qarjy - 230 mln teńgeden astam», - dedi Marat Júndibaev.
Taǵy bir jańalyq - 2019 jyldyń mamyr aıynda Qostanaıdaǵy Jastar saraıynyń saltanatty ashylýyna oraı Qazaqstan men Reseı jastarynyń yntamaqtastyq forýmy ótedi. Oǵan eki elden barlyǵy 500-den astam delegat qatysady dep kútilýde. Marat Júndibaev aıtýly sharaǵa barlyq aýdan-qala ákimderin belsendi atsalysýǵa shaqyrdy.
Jalpy, bıyl oblysta Jastar jylyna arnalǵan aýqymdy sharalarǵa 300 mln teńge bólinip otyr. Sonyń ishinde, áleýmettik mańyzy bar bastamalarǵa 65 mln teńge qarjy qarastyrylǵan. Máselen, «Jasyl qala - jasyl aýyl» atty qoǵamdyq jobany júzege asyrý josparlanyp otyr. Osy rette oblystaǵy JOO men kolledjder, jastar resýrstyq ortalyqtary stýdentter arasynda eriktilerdi oqytý kýrsyn uıymdastyrmaq.