Qostanaıda qazaq kúresinen respýblıkalyq týrnır aıaqtaldy
Aıtýly týrnırge Ońtústik Qazaqstan, Soltústik Qazaqstan, Pavlodar, Óskemen, Qostanaı, Arqalyqtan kelgen júzge tarta bozkilem sheberi qatysyp, eki kún boıy kúsh synasty.
55 keli salmaqta kilemge shyqqan arqalyqtyq Kelden Batýhan jarys jeńimpazy atandy. Al 60 kelide qyzylordalyq Baýyrjan Raıysovtyń mereıi ústem boldy. 66 kelide synǵa túsken ońtústikqazaqstandyq Ámir Erik top jarsa, petropavldyq Qaıyrbek Batyrdan 74 keli salmaqta eshkimge des bergen joq. 82 keli salmaqta shymkenttik taǵy bir oǵlan - Rýslan Óskembaev jeńis tuǵyryna kóterildi. Onyń jerlesi Aıbek Sydyqov 90 kelige deıingi aýyr salmaqta top jardy. 100 keli salmaqta Ońtústik Qazaqstan oblysynyń palýany Qaısar Shámshıdenov týrnır jeńimpazy boldy. Al 100 keliden aýyr salmaqta osy óńirdiń taǵy bir palýany Nursultan Myńǵyshevke teń keler sportshy tabylmady. Ózderińiz baıqaǵandaı, salmaq dárejesi boıynsha tigilgen júldelerdiń tórteýin ońtústikten kelgen ulandar qanjyǵasyna bókterip áketti.
Kúrestiń «kókesi» absolıýttik syn ekeni belgili. Týrnırdiń «túıe palýany» ataǵyn Ońtústik Qazaqstannan kelgen Qaısar Shámshıdenov ıelendi.
«Ahań atamyzdy eske alýǵa arnalǵan respýblıkalyq týrnır óte joǵary deńgeıde ótti deýge tolyq negiz bar. Jarysqa qatysýshylardyń deńgeıi osyny kórsetti. Palýandardyń arasynda elishilik jarystardan bólek, halyqaralyq syndarǵa qatysyp, júldeger atanyp júrgen palýandar da bar. Olarǵa qarsy bizdiń jerlesterimiz laıyqty qarsylyq tanytty», - deıdi týrnırdiń tóreshisi Nurbol Ábdiǵalıev.
Aıta ketken jón, sharaǵa qatysýshylar Ahmet Baıtursynulynyń eskertkishine gúl shoqtaryn qoıyp, taǵzym etti.