Qostanaıda karantınge qaramastan toı jasap, qudalyq ótkizgender jaýapqa tartyldy

QOSTANAI. QazAqparat – Qostanaı oblysynda shekteý sharalaryna qaramastan toı jasaǵandarı ákimshilik jaýapqa tartyldy, dep habarlaıdy QazAqparat tilshisi oblystyq polıtsııa departamenti baspasóz qyzmetine silteme jasap.

Vedomstvo málimetine súıensek, ótken eki kún ishinde oblysta karantın rejımi 232 ret buzylǵan. Shekteýlerge qaramastan, aımaq turǵyndary týǵan kúnder, úılený toılary men eske alý keshterin ótkizip keledi.

«Qostanaı qalasynda otbasylyq merekeler, sondaı-aq eske alý is-sharalaryn ótkizý faktileri anyqtaldy. Mysaly, «Eýrazııa» meıramhanasyndaǵy úılený toıyna 50-den astam adam qatyssa, «Dııarda» dámhanasynda eske alý túski asy ótken. Sondaı-aq oblys ortalyǵynda 35 adamnyń qatysýymen qudalyq toıy uıymdastyryldy. Buǵan qosa kottedjderde týǵan kúnder men qyz uzatý rásimderin ótkizgender anyqtaldy. Oblystyń bas sanıtar dárigerdiń buıryǵymen tyıym salynǵan dámhanalarda 30-dan astam kelýshi tirkeldi. Túngi ýaqytta jumys istegen eki saýnanyń basshysy jaýapqa tartyldy», delingen polıtsııanyń aqparatynda.

Polıtsııa departamenti karantın rejımin buzǵan barlyq oblys turǵyndary ákimshilik jaýapqa tartylatynyn eske salady.

Aıt keteıik, Qostanaı oblysynyń ákimi Arhımed Muhambetov karantın rejımin saqtaý jónindegi monıtorıngtik toptardyń jumysyn kúsheıtýdi tapsyrdy.